يران اقش تاراپىنان جاسالعان بلوكادا مەن شابۋىلدار توقتاتىلعان جاعدايدا ورمۇز بۇعازىن اشۋعا دايىن ەكەنىن ايتتى، دەپ حابارلايدى "ادىرنا" ءتىلشىسى.
بۇل تۋرالى يران پرەزيدەنتى ماسۋد پەزەشكيان حابارلادى.
ءۇندىستاننىڭ India Today تەلەارناسىنا بەرگەن سۇحباتىندا يران پرەزيدەنتى اقش اسكەري جولمەن ءوز ماقساتىنا جەتە الماعان سوڭ ەكونوميكالىق قىسىمعا كوشكەنىن ايتتى.
«ولار سوعىس ارقىلى ءوز ماقساتتارىنا جەتە المادى. سوندىقتان ەكونوميكالىق قىسىمعا كوشتى. الايدا ءبىز توقتامايمىز»، – دەدى ماسۋد پەزەشكيان.
ونىڭ ايتۋىنشا، تەڭىز بلوكاداسى ارقىلى دا اقش ءوز ماقساتىنا جەتە المايدى.
«تەڭىز جولى – ءبىزدىڭ ءومىرىمىز تاۋەلدى جالعىز باعىت ەمەس. بۇل جولمەن دە ولار ءوز ماقساتتارىنا جەتە المايدى»، – دەدى يران پرەزيدەنتى.
ماسۋد پەزەشكيان اقش تاراپىنان بلوكادا مەن اسكەري شابۋىلدار توقتاعان جاعدايدا ورمۇز بۇعازى اشىلاتىنىن اتاپ ءوتتى.
سونىمەن قاتار ول يران مەن وماننىڭ ورمۋز بۇعازىنا قاتىستى كەلىسسوزدەر جۇرگىزىپ جاتقانىن ايتتى. پەزەشكياننىڭ سوزىنشە، اراب ەلدەرىنىڭ سىرتقى ىستەر مينيسترلەرى ماسكاتتا كەزدەسىپ، بۇعاز ارقىلى تەڭىز قاتىناسىن ۇيىمداستىرۋعا قاتىستى كەلىسىمگە قول قويۋى جوسپارلانعان.
يران پرەزيدەنتى بۇل كەلىسىم تۋرالى حالىقارالىق تەڭىز ۇيىمىنا حابارلاناتىنىن جەتكىزدى.
بۇعان دەيىن يران ورمۇز بۇعازى ماڭىندا ارنايى باقىلاۋ ايماعىن قۇراتىنىن حابارلاعان.
