پەتروپاۆلدا مۇگەدەكتىگى بار قىزدى زورلادى دەگەن كۇدىكپەن 2 ەر ادام ۇستالدى. بۇل تۋرالى سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتى تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
«3 تامىز كۇنى پەتروپاۆل قالالىق پوليتسيا باسقارماسىنا اباي كوشەسىندەگى جالعا بەرىلەتىن پاتەرلەردىڭ بىرىندە وبلىس ورتالىعىنىڭ 32 جاستاعى تۇرعىنى زورلانعانى تۋرالى حابارلاما ءتۇستى. بۇل فاكتى قر قك 120-بابى 2-بولىگى، 1-تارماعى «زورلاۋ» بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە تىركەلدى. پوليتسيا سقو-نىڭ 48 جانە 32 جاستاعى ەكى تۇرعىنىن انىقتادى.
قازىر وسى دەرەك بويىنشا ءتيىستى ساراپتامالار تاعايىندالدى، قاجەتتى تەرگەۋ امالدارى جۇرگىزىلىپ جاتىر. ونىڭ ناتيجەسى بويىنشا زاڭدى پروتسەسسۋالدىق شەشىم قابىلدانادى. قالعان اقپارات قر قپك 201-بابىنا سايكەس جاريا ەتىلمەيدى»، – دەپ جازىلعان حابارلامادا.
زارداپ شەككەن قىزدىڭ تانىسىنىڭ ايتۋىنشا، بويجەتكەننىڭ اقىل-ەسىنىڭ كەمىستىگى بار، اناسى دا اۋىرادى. كوپقاباتتى ءۇيدىڭ اۋلاسىندا اتكەنشەك تەۋىپ وتىرعان ونى كورشىلەرىنىڭ ءبىرى قاسىنداعى ۇيگە، جالعا بەرىلەتىن پاتەرگە الىپ كەتكەن. ول جەردە تاعى ەكى ەر ادام بولعان. تەك تاڭەرتەڭ عانا جىبەرگەن.
«تاڭەرتەڭ مەنىڭ الدىمنان شىقتى، ونى ۇرعان. نە بولعانىن ايتىپ بەردى. پوليتسياعا بارىپ ارىز جازدى. ساراپتامادان ءوتتى»، – دەيدى زارداپ شەگۋشىنىڭ تانىسى.
”ادىرنا” ۇلتتىق پورتالى
