وڭتۇستىك كورەيانىڭ بۇرىنعى پرەزيدەنتى يۋن سوك ءيولدىڭ جۇبايى، كاسىپكەر كيم گون حي سىبايلاس جەمقورلىق ءىسى بويىنشا 1 جىل 8 ايعا باس بوستاندىعىنان ايىرىلدى. بۇل تۋرالى سارسەنبى كۇنى Yonhap اگەنتتىگى جازدى، دەپ حابارلايدى «ادىرنا» ءتىلشىسى.
سوت كيم گون حي «بىرىگۋ شىركەۋى» اتتى ءدىني ۇيىمنان قىمبات سىيلىقتار العانى ءۇشىن كىنالى دەپ تانىلدى. تەرگەۋ بارىسىندا ونىڭ Chanel سومكەلەرى مەن باعالى اشەكەيلەر العانى انىقتالعان. سونىمەن قاتار كاسىپكەر اكتسيالارمەن مانيپۋلياتسيا جاساۋ جانە ساياسي قىزمەتتى قارجىلاندىرۋ تۋرالى زاڭدى بۇزۋ ايىپتارى بويىنشا اقتالدى.
ايتا كەتەيىك، ايىپتاۋ تاراپى باستاپقىدا كيم گون حيگە 15 جىل تۇرمە جازاسىن سۇراعان بولاتىن.
وڭتۇستىك كورەيانىڭ ەكس-ءبىرىنشى حانىمىن قاماۋعا الۋ تۋرالى شەشىم 2025 جىلعى 12 تامىزدا قابىلدانعان ەدى. بۇعان دەيىن ول سوت وتىرىسىندا كوپشىلىك الدىندا كەشىرىم سۇراعان بولاتىن.
