كونستيتۋتسيالىق رەفورما جونىندەگى كوميسسيا وتىرىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، «اۋىل» پارتياسى فراكتسياسىنىڭ جەتەكشىسى سەرىك ەگىزباەۆ رەفورمانىڭ نەگىزىن قۇرايتىن ءۇش ستراتەگيالىق تىرەكتى بەلگىلەپ بەردى.
ەڭ الدىمەن، دەپۋتاتتىڭ پىكىرىنشە، جاڭا كونستيتۋتسيالىق رەداكتسياعا سايكەس، قۇرىلتايدىڭ زاڭ شىعارۋشى بيلىكتى جۇزەگە اسىراتىن ەڭ جوعارى وكىلدى ورگان بولىپ بەكىتىلگەنى – بۇل زاڭ شىعارۋ پروتسەسىندەگى ارتىق بيۋروكراتيانى، پالاتالار اراسىنداعى ۇزاق كەلىسىمدەر مەن كەدەرگىلەردى جويادى جانە حالىقتىڭ بيلىككە تىكەلەي قاتىسۋىن قامتاماسىز ەتەدى.
«كونستيتۋتسيا بويىنشا مەملەكەتتىك بيلىكتىڭ بىردەن-ءبىر باستاۋى - حالىق. بۇل دەگەنىمىز - قۇرىلتاي جاي عانا زاڭ قابىلداۋشى مەكەمە ەمەس، ول - حالىقتىڭ بيلىككە تىكەلەي قاتىسۋىن قامتاماسىز ەتەتىن، ەگەمەندىگىمىزدىڭ سيمۆولىنا اينالاتىن ەڭ جوعارى لەگيتيمدى ورگان دەگەن ءسوز. بيلىككە ەشكىمنىڭ قول سۇعۋىنا جول بەرمەيتىن بۇل كونستيتۋتسيالىق نورما - مەملەكەتتىلىگىمىزدىڭ مىزعىماس كەپىلى. قۇرىلتاي زاڭنىڭ جوبالانۋىنان باستاپ ونىڭ قابىلدانىپ، كۇشىنە ەنۋىنە دەيىن - باسىنان اياعىنا دەيىن تولىق جاۋاپكەرشىلىكتى ءوز موينىنا الادى»، – دەدى ول.
سونىمەن قاتار، سەرىك ەگىزباەۆتىڭ پىكىرىنشە، پارتيالىق ءتىزىم - كاسىبيلىك پەن ساياسي مادەنيەتتىڭ كەپىلى.
«ستراتەگيالىق ماڭىزى بار تاعى ءبىر شەشىم - قۇرىلتايدىڭ پروپورتسيونالدى نەگىزدە، ياعني پارتيالىق تىزىمدەر ارقىلى جاساقتالۋى. بۇل - ەلىمىزدىڭ ساياسي مادەنيەتىن مۇلدەم جاڭا بيىككە كوتەرەدى. پارتيالىق ءتىزىم – قۇرىلتايدىڭ ينتەللەكتۋالدىق الەۋەتىن قامتاماسىز ەتەتىن نەگىزگى تەتىك. بۇل جۇيە ارقىلى ءبىز پارلامەنتكە قوعامنىڭ بارلىق توبىن، اسىرەسە اۋىل ماماندارىن، ءبىلىمدى جاستار مەن بەلسەندى ايەلدەردى تارتامىز»، – دەپ ايتتى ءماجىلىس دەپۋتاتى.
ال حالىق كەڭەسىنە كەلگەندە ول بۇل ورگاننىڭ قۇزىرەتى بۇرىنعى قازاقستان حالقى اسسامبلەياسى يە بولعان مۇمكىندىكتەردەن الدەقايدا كەڭ جانە پارمەندى ەكەنىن جەتكىزدى.
«حالىق كەڭەسىنىڭ فۋنكتسيالارى ەندى ۋاقىتشا ەرەجەلەر نەمەسە جارلىقتار ەمەس، اتا زاڭنىڭ اجىراماس بولىگىنە اينالدى. ولار - مىزعىماس، ەشكىمنىڭ ەركىمەن وزگەرمەيتىن، كونستيتۋتسيالىق تۇرعىدان قورعالعان قۇقىقتار. بۇل - حالىق كەڭەسىنىڭ مەملەكەتتىك يەرارحياداعى ورنىن بەكەمدەيدى. حالىق كەڭەسى- قۇرىلتايعا تىكەلەي زاڭ جوبالارىن ەنگىزۋگە جانە ەڭ ماڭىزدى مەملەكەتتىك ماسەلەلەر بويىنشا رەفەرەندۋم باستاماسىن كوتەرۋگە قۇقىلى. «اۋىل» پارتياسى حالىق جۇكتەگەن وسى تاريحي رەفورمالاردى جۇزەگە اسىرۋ ءۇشىن ءوزىنىڭ بارلىق كاسىبي الەۋەتىن جۇمساۋعا دايىن. ءبىز اۋىلداعى اعايىننىڭ سەنىمىنە ادال بولىپ، ەل ءۇمىتىن ىسپەن اقتاۋدى باستى بورىشىمىز دەپ بىلەمىز»، – دەپ، ول ءوز ءسوزىن قورىتىندىلادى.
