ۇلىتاۋ وبلىسىندا رەسپۋبليكالىق رەفەرەندۋم بارىسىندا ەل بولاشاعىنا بەيجاي قارامايتىن اعا بۋىن وكىلدەرى دە ازاماتتىق بەلسەندىلىك تانىتۋدا. سونىڭ جارقىن ۇلگىسىن جاڭاارقا اۋدانىنىڭ تۇرعىنى، 116 جاستاعى تۇيمەگۇل تەمىرباەۆا كورسەتتى.
قىزىلجار كەنتىندە تۇراتىن كەيۋانا رەفەرەندۋمدا داۋىس بەرىپ، ءوزىنىڭ ازاماتتىق تاڭداۋىن جاسادى. قارت ادامنىڭ جاسى مەن دەنساۋلىق جاعدايىن ەسكەرە وتىرىپ، ۋچاسكەلىك رەفەرەندۋم كوميسسياسىنىڭ مۇشەلەرى ارنايى داۋىس بەرۋ جاشىگىن ونىڭ ۇيىنە اپاردى.
ۇلىتاۋ وبلىسى جاڭاارقا اۋدانى، قىزىلجار كەنتىنىڭ تۇرعىنى تۇيمەگۇل تەمىرباەۆا 1910 جىلى دۇنيەگە كەلگەن. بيىل قاڭتار ايىندا ول 116 جاسقا تولىپ، قازاقستانداعى ەڭ قارت تۇرعىن اتاندى.
ءومىرىن وتباسىنا ارناعان تۇيمەگۇل اجەنىڭ ايتۋىنشا، ۇزاق ءومىر ءسۇرۋدىڭ باستى سىرى – ەڭبەكقورلىق پەن جاقىن ادامدارعا دەگەن سۇيىسپەنشىلىك. بۇگىندە اجەنىڭ 15 نەمەرەسى جانە 25 شوبەرەسى بار. ول ءومىر بويى وتباسىنىڭ تىرەگى بولىپ، بالالار مەن نەمەرەلەرىنە ۇلگى كورسەتىپ كەلەدى.
تۋىستارىنىڭ ايتۋىنشا، تۇيمەگۇل اجە دەنساۋلىعىنا ەشقاشان شاعىم ايتپاعان، ءاردايىم بەلسەندى بولىپ، وتباسى مۇشەلەرىمەن بىرگە ءتۇرلى وتباسىلىق ءىس-شارالارعا قاتىسىپ وتىرادى.
وسىلايشا عاسىردان اسقان ۇلىتاۋلىق ماڭىزدى ساياسي ناۋقاننان شەت قالماي، ەل تاعدىرىنا قاتىستى شەشىم قابىلداۋعا ءوز ۇلەسىن قوستى.
ايتا كەتەيىك، ۇلىتاۋ وبلىسىندا رەسپۋبليكالىق رەفەرەندۋمعا تۇرعىنداردىڭ قاتىسۋى بەلسەندى تۇردە جالعاسۋدا.
