15 ناۋرىز كۇنى قاراتال اۋدانىننىڭ كالپە اۋىلىندا رەفەرەندۋم جوعارى بەلسەندىلىكپەن وتۋدە. اۋىل تۇرعىندارى ۇيىمشىلدىق پەن بىرلىكتىڭ جارقىن ۇلگىسىن كورسەتىپ، ءبىر مەزەتتە 400-گە جۋىق ادام داۋىس بەرۋگە جينالدى.
كالپە اۋىلىنا قاراستى 14 كوشەنىڭ تۇرعىندارى №157 سايلاۋ ۋچاسكەسىنە كەلىپ، وزدەرىنىڭ ازاماتتىق تاڭداۋىن جاسادى. ەلدىك ماڭىزى بار ناۋقانعا اۋىل حالقى ەرەكشە جاۋاپكەرشىلىكپەن قاراپ، بەلسەندىلىك تانىتتى.
ءبىر ەرەكشەلىگى، رەفەرەندۋم ناۋرىزنامانىڭ ونكۇندىگىمەن تۇسپا-تۇس كەلىپ، اۋىلدا ەرەكشە مەرەكەلىك كوڭىل كۇي قالىپتاستىردى. سايلاۋ ۋچاسكەسىنىڭ ماڭىندا تىگىلگەن كيىز ۇيدە جينالعان تۇرعىندارعا ۇلتتىق تاعامدار ۇسىنىلدى. جاستار التىباقان تەۋىپ، بالالار اسىق اتىپ، اۋىل ءىشى ۇلتتىق داستۇرگە ساي دۋمانعا ۇلاستى.
«قارتى بار ءۇيدىڭ قازىناسى بار» دەمەكشى، اۋىلدىڭ توقساننان اسقان قاريالارى دا بۇل ماڭىزدى ناۋقاننان شەت قالمادى. 1934 جىلى دۇنيەگە كەلگەن سۇلەيمەن انداسباەۆ ءومىرىنىڭ 40 جىلىن مال دارىگەرى قىزمەتىنە ارناپ، ەل يگىلىگى ءۇشىن ەڭبەك ەتكەن. ال باتەن بۇلدىباەۆا اپامىز دەنساۋلىق ساقتاۋ سالاسىندا ۇزاق جىل قىزمەت اتقارعان ارداگەر مامان. عاسىردى ەڭسەرگەن قوس قاريا دا سايلاۋ ۋچاسكەسىنە ارنايى كەلىپ، ءوز تاڭداۋلارىن جاسادى.
بۇل – ۇلكەندەردىڭ ەل تاعدىرىنا بەيجاي قارامايتىنىن كورسەتەتىن ونەگەلى ءىس ءارى جاس ۇرپاققا ۇلگى.
وسىلايشا №157 سايلاۋ ۋچاسكەسىندە وتكەن رەفەرەندۋم اۋىل تۇرعىندارىنىڭ بىرلىگى مەن ازاماتتىق بەلسەندىلىگىن ايقىنداعان ماڭىزدى كۇن رەتىندە كوپشىلىكتىڭ ەسىندە ساقتالارى انىق.
