قاراعاندى وڭىرىندەگى ەتنومادەني بىرلەستىكتەر قازاقستان رەسپۋبليكاسىنىڭ جاڭا كونستيتۋتسياسى جوباسىن قولدايتىندارىن ءبىلدىرىپ، بۇل باستامانىڭ ۇلتارالىق كەلىسىمدى نىعايتۋعا جانە ەتنومادەني ارالۋاندىقتى ساقتاۋعا باعىتتالعانىن اتاپ ءوتتى.
قاراعاندى وبلىسى — ەلدەگى ەڭ كوپۇلتتى ايماقتاردىڭ ءبىرى. مۇندا جۇزدەن استام ەتنوس وكىلدەرى ءومىر سۇرەدى، وبلىستىق دەڭگەيدە 20-دان اسا ەتنومادەني بىرلەستىك جۇمىس ىستەيدى. ولاردىڭ بارلىعى قازاقستان حالقى اسسامبلەياسىنىڭ قۇرامىنا ەنگەن.
بىرلەستىك وكىلدەرىنىڭ پىكىرىنشە، نەگىزگى زاڭعا ۇسىنىلىپ وتىرعان وزگەرىستەر ازاماتتاردىڭ قۇقىقتىق تەڭدىگىن ناقتىلاي تۇسەدى، شەشىم قابىلداۋ ۇدەرىسىنە قاتىسۋ مۇمكىندىگىن كەڭەيتەدى جانە مەملەكەت پەن قوعام اراسىنداعى ءوزارا جاۋاپكەرشىلىك قاعيداتتارىن كۇشەيتەدى.
— 15 ناۋرىز — ەلىمىز ءۇشىن تاريحي بەلەس. رەسپۋبليكامىزدىڭ باستى قۇجاتى — كونستيتۋتسياعا اۋقىمدى تۇزەتۋلەر ەنگىزىلۋدە. بۇل كۇنى بۇكىلحالىقتىق رەفەرەندۋمدا ەل بولاشاعىنا قاتىستى ماڭىزدى شەشىم قابىلدانادى. جاڭا كونستيتۋتسيا كوپۇلتتى قازاقستاننىڭ ىرگەتاسى سانالاتىن ادىلدىك پەن ءوزارا قۇرمەت قاعيداتتارىن ايقىندايدى، — دەدى تۇرىك ەتنومادەني بىرلەستىگىنىڭ مۇشەسى زارينا سافاروۆا.
«داگەستان» ۇلتتىق مادەني ورتالىعىنىڭ توراعاسى راميز شارينوۆ رەفورمالاردى ەلدىڭ ۇزاقمەرزىمدى دامۋى مەن ازاماتتاردىڭ قۇقىقتارىن قورعاۋ تەتىكتەرىن جەتىلدىرۋمەن بايلانىستىرادى.
— مەن قازاقستاننىڭ شىنايى پاتريوتى رەتىندە جاستاردىڭ كەلەشەگىنە بەيجاي قاراي المايمىن. وڭىردەگى ساياسي جانە قوعامدىق ۇدەرىستەردى ۇنەمى نازاردا ۇستايمىن. ارقايسىمىز ءوز تاعدىرىمىزعا، مەملەكەتىمىزدىڭ دامۋىنا جاۋاپتىمىز. جاڭا كونستيتۋتسيا — ەركىندىگىمىز بەن قۇقىقتارىمىزدىڭ كەپىلى. بۇل — قازاقستاندىقتاردىڭ مۇددەسىنە قىزمەت ەتۋى ءتيىس باستى زاڭ. بۇگىندە وندا ينستيتۋتسيونالدىق جاڭعىرۋ تەتىكتەرى، ەگەمەندىكتى نىعايتۋ جانە ەتنومادەني مۇرانى ساقتاۋ كەپىلدىكتەرى ناقتى بەكىتىلىپ وتىر، — دەدى راميز شارينوۆ.
Lituanica قوعامدىق بىرلەستىگىنىڭ توراعاسى جاھاندىق وزگەرىستەر كەزەڭىندە ازاماتتىق جاۋاپكەرشىلىك تانىتۋدىڭ ماڭىزىن اتاپ ءوتىپ، قوعامدىق كەلىسىم مەن بارلىق ازاماتتارعا تەڭ مۇمكىندىك قاعيداتتارىن نىعايتۋعا باعىتتالعان رەفورمالاردى قولداۋعا شاقىردى.
«كازاچيا ۆولنيتسا» قوعامدىق بىرلەستىگىنىڭ مۇشەسى سەمەن راكوۆ تا قازاقستاندىقتاردى رەفەرەندۋمعا بەلسەندى قاتىسۋعا ۇندەدى.
— ءار ازامات رەفەرەندۋمعا قاتىسۋى قاجەت دەپ سانايمىن. ويتكەنى قابىلداناتىن شەشىم ەلىمىزدىڭ، بالالارىمىزدىڭ، نەمەرەلەرىمىز بەن شوبەرەلەرىمىزدىڭ بولاشاعىنا تىكەلەي اسەر ەتەدى، — دەدى ول.
رەفورمالاردى قولداۋ پىكىرلەرى قاراعاندى وبلىسىنىڭ دوستىق ۇيىندە وتكەن جانە العىس ايتۋ كۇنىنە وراي ۇيىمداستىرىلعان «العىسىم ساعان شەكسىز!» اكتسياسى اياسىندا دا ايتىلدى. بۇل مەرەكە ءداستۇرلى تۇردە قوعامدى تاريحي جادى، ىنتىماق پەن ەل بولاشاعىنا ورتاق جاۋاپكەرشىلىك قۇندىلىقتارى توڭىرەگىنە توپتاستىرادى.
— العىس ايتۋ كۇنى بۇكىل قازاقستان حالقى ءۇشىن ماڭىزدى قوعامدىق وقيعانىڭ قارساڭىندا ءوتىپ وتىر. ەلىمىزدە ءاردايىم بەيبىتشىلىك، ءوزارا تۇسىنىستىك پەن ىرىس-بەرەكە ۇستەم بولسىن. ءبىر-بىرىمىزگە دەگەن قۇرمەت قوعامىمىزدىڭ مىزعىماس تىرەگى بولىپ قالا بەرسىن، — دەدى «ۆايناح» وبلىستىق شەشەن-ينگۋش ەتنومادەني بىرلەستىگى توراعاسى ۋۆايس دجاناەۆ.
ءىس-شارا بارىسىندا دارىگەرلەرگە، پەداگوگتارعا، جاتتىقتىرۋشىلارعا، پوليتسيا مەن ءورت ءسوندىرۋ قىزمەتىنىڭ ماماندارىنا العىس ءبىلدىرىلدى.
اسىرەسە اسكەري قىزمەتشىلەردىڭ انالارىمەن كەزدەسۋى كوپشىلىككە ەرەكشە اسەر قالدىردى.
اكتسيا اياسىندا حالىقتىق قولدانبالى ونەر كورمەسى ۇيىمداستىرىلىپ، سىيلىق جاساۋ بويىنشا شەبەرلىك ساعاتتارى وتكىزىلدى.
