Qaraǧandy öŋırındegı etnomädeni bırlestıkter Qazaqstan Respublikasynyŋ jaŋa Konstitusiiasy jobasyn qoldaityndaryn bıldırıp, būl bastamanyŋ ūltaralyq kelısımdı nyǧaituǧa jäne etnomädeni äraluandyqty saqtauǧa baǧyttalǧanyn atap öttı.
Qaraǧandy oblysy — eldegı eŋ köpūltty aimaqtardyŋ bırı. Mūnda jüzden astam etnos ökılderı ömır süredı, oblystyq deŋgeide 20-dan asa etnomädeni bırlestık jūmys ısteidı. Olardyŋ barlyǧy Qazaqstan halqy Assambleiasynyŋ qūramyna engen.
Bırlestık ökılderınıŋ pıkırınşe, Negızgı zaŋǧa ūsynylyp otyrǧan özgerıster azamattardyŋ qūqyqtyq teŋdıgın naqtylai tüsedı, şeşım qabyldau üderısıne qatysu mümkındıgın keŋeitedı jäne memleket pen qoǧam arasyndaǧy özara jauapkerşılık qaǧidattaryn küşeitedı.
— 15 nauryz — elımız üşın tarihi beles. Respublikamyzdyŋ basty qūjaty — Konstitusiiaǧa auqymdy tüzetuler engızılude. Būl künı bükılhalyqtyq referendumda el bolaşaǧyna qatysty maŋyzdy şeşım qabyldanady. Jaŋa Konstitusiia köpūltty Qazaqstannyŋ ırgetasy sanalatyn ädıldık pen özara qūrmet qaǧidattaryn aiqyndaidy, — dedı Türık etnomädeni bırlestıgınıŋ müşesı Zarina Safarova.
«Dagestan» ūlttyq mädeni ortalyǧynyŋ töraǧasy Ramiz Şarinov reformalardy eldıŋ ūzaqmerzımdı damuy men azamattardyŋ qūqyqtaryn qorǧau tetıkterın jetıldırumen bailanystyrady.
— Men Qazaqstannyŋ şynaiy patrioty retınde jastardyŋ keleşegıne beijai qarai almaimyn. Öŋırdegı saiasi jäne qoǧamdyq üderısterdı ünemı nazarda ūstaimyn. Ärqaisymyz öz taǧdyrymyzǧa, memleketımızdıŋ damuyna jauaptymyz. Jaŋa Konstitusiia — erkındıgımız ben qūqyqtarymyzdyŋ kepılı. Būl — qazaqstandyqtardyŋ müddesıne qyzmet etuı tiıs basty zaŋ. Bügınde onda institusionaldyq jaŋǧyru tetıkterı, egemendıktı nyǧaitu jäne etnomädeni mūrany saqtau kepıldıkterı naqty bekıtılıp otyr, — dedı Ramiz Şarinov.
Lituanica qoǧamdyq bırlestıgınıŋ töraǧasy jahandyq özgerıster kezeŋınde azamattyq jauapkerşılık tanytudyŋ maŋyzyn atap ötıp, qoǧamdyq kelısım men barlyq azamattarǧa teŋ mümkındık qaǧidattaryn nyǧaituǧa baǧyttalǧan reformalardy qoldauǧa şaqyrdy.
«Kazachia volnisa» qoǧamdyq bırlestıgınıŋ müşesı Semen Rakov ta qazaqstandyqtardy referendumǧa belsendı qatysuǧa ündedı.
— Är azamat referendumǧa qatysuy qajet dep sanaimyn. Öitkenı qabyldanatyn şeşım elımızdıŋ, balalarymyzdyŋ, nemerelerımız ben şöberelerımızdıŋ bolaşaǧyna tıkelei äser etedı, — dedı ol.
Reformalardy qoldau pıkırlerı Qaraǧandy oblysynyŋ Dostyq üiınde ötken jäne Alǧys aitu künıne orai ūiymdastyrylǧan «Alǧysym saǧan şeksız!» aksiiasy aiasynda da aityldy. Būl mereke dästürlı türde qoǧamdy tarihi jady, yntymaq pen el bolaşaǧyna ortaq jauapkerşılık qūndylyqtary töŋıregıne toptastyrady.
— Alǧys aitu künı bükıl Qazaqstan halqy üşın maŋyzdy qoǧamdyq oqiǧanyŋ qarsaŋynda ötıp otyr. Elımızde ärdaiym beibıtşılık, özara tüsınıstık pen yrys-bereke üstem bolsyn. Bır-bırımızge degen qūrmet qoǧamymyzdyŋ myzǧymas tıregı bolyp qala bersın, — dedı «Vainah» oblystyq şeşen-inguş etnomädeni bırlestıgı töraǧasy Uvais Djanaev.
Is-şara barysynda därıgerlerge, pedagogtarǧa, jattyqtyruşylarǧa, polisiia men ört söndıru qyzmetınıŋ mamandaryna alǧys bıldırıldı.
Äsırese äskeri qyzmetşılerdıŋ analarymen kezdesuı köpşılıkke erekşe äser qaldyrdy.
Aksiia aiasynda halyqtyq qoldanbaly öner körmesı ūiymdastyrylyp, syilyq jasau boiynşa şeberlık saǧattary ötkızıldı.
