بۇگىن، 15 ناۋرىز كۇنى اقتاۋ قالاسىندا ءوتىپ جاتقان رەسپۋبليكالىق رەفەرەندۋمدا ەكىنشى دۇنيەجۇزىلىك سوعىس ارداگەرى، 99 جاستاعى ۆاسيلي سالازكين ءوز تاڭداۋىن جاسادى.
قۇرمەتتى ارداگەر دەنساۋلىعىنا بايلانىستى №34 سايلاۋ ۋچاسكەسىنىڭ جىلجىمالى داۋىس بەرۋ جاشىگى ارقىلى ۇيىندە داۋىس بەردى. ۋچاسكەلىك رەفەرەندۋم كوميسسياسىنىڭ مۇشەلەرى ارداگەردىڭ ءوتىنىشى نەگىزىندە ونىڭ ۇيىنە بارىپ، داۋىس بەرۋ ءراسىمىن زاڭ تالاپتارىنا سايكەس ۇيىمداستىردى.
ەل باسىنا كۇن تۋعان كەزەڭدە وتان قورعاپ، بەيبىت ءومىردىڭ ورناۋىنا ۇلەس قوسقان ارداگەر بۇگىنگى ماڭىزدى ساياسي ناۋقاننان تىس قالماي، ەل بولاشاعى ءۇشىن ءوز تاڭداۋىن جاسادى.
ايتا كەتەيىك، رەفەرەندۋم بارىسىندا دەنساۋلىعىنا نەمەسە وزگە دە سەبەپتەرگە بايلانىستى سايلاۋ ۋچاسكەسىنە كەلە المايتىن ازاماتتار ءۇشىن جىلجىمالى داۋىس بەرۋ جاشىگى ارقىلى ۇيدە داۋىس بەرۋ مۇمكىندىگى قاراستىرىلعان.
