شۆەيتساريادا ەل حالقىنىڭ سانىن 10 ميلليون ادامنان اسىرماۋدى كوزدەيتىن باستاما بويىنشا جالپىحالىقتىق رەفەرەندۋم ءوتىپ جاتىر. بۇل تۋرالى Euronews جازدى، دەپ حابارلايدى “ادىرنا”.
«10 ميلليون حالقى بار شۆەيتسارياعا جول جوق!» اتتى باستامانى وڭشىل باعىتتاعى شۆەيتساريا حالىق پارتياسى ۇسىنعان. قۇجاتقا سايكەس، ەل حالقىنىڭ سانى 2050 جىلعا دەيىن 10 ميلليون ادامنان تومەن دەڭگەيدە ساقتالۋى ءتيىس.
پارتيا وكىلدەرىنىڭ ايتۋىنشا، باقىلاۋسىز كوشى-قون تۇرعىن ءۇي نارىعىنا، ءبىلىم بەرۋ جۇيەسىنە، مەملەكەتتىك قىزمەتتەر مەن قورشاعان ورتاعا قوسىمشا سالماق ءتۇسىرىپ وتىر. وسىعان بايلانىستى ولار حالىق سانىنىڭ ءوسۋىن شەكتەۋدى ۇسىنادى.
رەسمي مالىمەتتەر بويىنشا، 2025 جىلدىڭ سوڭىندا شۆەيتساريادا شامامەن 9,1 ميلليون ادام تۇرعان. ونىڭ 27 پايىزى شەتەل ازاماتتارى. ەگەر حالىق سانى 9,5 ميلليوننان اسسا، پارلامەنت بوسقىنداردى قابىلداۋ جانە وتباسىلاردى بىرىكتىرۋ باعدارلامالارىن قايتا قاراۋعا مىندەتتەلەدى. ال كورسەتكىش 10 ميلليونعا جەتكەن جاعدايدا ەلدىڭ ەۋروپالىق وداقپەن ەركىن ءجۇرىپ-تۇرۋ جونىندەگى كەلىسىمدەرىن توقتاتۋ ماسەلەسى كوتەرىلۋى مۇمكىن.
الايدا ۇكىمەت پەن ءىرى بيزنەس قاۋىمداستىعى باستاماعا قارسى شىعىپ وتىر. ولاردىڭ پىكىرىنشە، بۇل شەشىم ەكونوميكاعا كەرى اسەر ەتىپ، ەڭبەك نارىعىندا كادر تاپشىلىعىن كۇشەيتۋى ىقتيمال.
ساراپشىلاردىڭ ايتۋىنشا، شۆەيتساريانىڭ دەنساۋلىق ساقتاۋ، قۇرىلىس، عىلىمي زەرتتەۋ جانە قوناقۇي بيزنەسى سەكىلدى ماڭىزدى سالالارى شەتەلدىك جۇمىس كۇشىنە تاۋەلدى. ماسەلەن، قوناقۇي سالاسىنداعى قىزمەتكەرلەردىڭ جارتىسىنان استامىن شەتەل ازاماتتارى قۇرايدى.
سونداي-اق باستامانىڭ قابىلدانۋى شۆەيتساريانىڭ نەگىزگى ساۋدا سەرىكتەسى سانالاتىن ەۋروپالىق وداقپەن قارىم-قاتىناسىنا اسەر ەتۋى مۇمكىن دەگەن الاڭداۋشىلىق بار. وتكەن جىلى ەل ەكسپورتىنىڭ جارتىسىنان استامى ەو مەملەكەتتەرىنە جونەلتىلگەن.
الدىن الا جۇرگىزىلگەن ساۋالنامالارعا سايكەس، حالىق سانىنىڭ ءوسۋىن شەكتەۋ تۋرالى ۇسىنىس كوپشىلىك قولداۋىنا يە بولماۋى مۇمكىن. دەگەنمەن رەفەرەندۋم ناتيجەسى ەلدىڭ كوشى-قون ساياساتى مەن ەۋروپالىق وداقپەن بايلانىسىنا ىقپال ەتەتىن ماڭىزدى شەشىمدەردىڭ ءبىرى بولماق.
