Şveisariiada el halqynyŋ sanyn 10 million adamnan asyrmaudy közdeitın bastama boiynşa jalpyhalyqtyq referendum ötıp jatyr. Būl turaly Euronews jazdy, dep habarlaidy “Adyrna”.
«10 million halqy bar Şveisariiaǧa jol joq!» atty bastamany oŋşyl baǧyttaǧy Şveisariia halyq partiiasy ūsynǧan. Qūjatqa säikes, el halqynyŋ sany 2050 jylǧa deiın 10 million adamnan tömen deŋgeide saqtaluy tiıs.
Partiia ökılderınıŋ aituynşa, baqylausyz köşı-qon tūrǧyn üi naryǧyna, bılım beru jüiesıne, memlekettık qyzmetter men qorşaǧan ortaǧa qosymşa salmaq tüsırıp otyr. Osyǧan bailanysty olar halyq sanynyŋ ösuın şekteudı ūsynady.
Resmi mälımetter boiynşa, 2025 jyldyŋ soŋynda Şveisariiada şamamen 9,1 million adam tūrǧan. Onyŋ 27 paiyzy şetel azamattary. Eger halyq sany 9,5 millionnan assa, parlament bosqyndardy qabyldau jäne otbasylardy bırıktıru baǧdarlamalaryn qaita qarauǧa mındetteledı. Al körsetkış 10 millionǧa jetken jaǧdaida eldıŋ Europalyq odaqpen erkın jürıp-tūru jönındegı kelısımderın toqtatu mäselesı köterıluı mümkın.
Alaida ükımet pen ırı biznes qauymdastyǧy bastamaǧa qarsy şyǧyp otyr. Olardyŋ pıkırınşe, būl şeşım ekonomikaǧa kerı äser etıp, eŋbek naryǧynda kadr tapşylyǧyn küşeituı yqtimal.
Sarapşylardyŋ aituynşa, Şveisariianyŋ densaulyq saqtau, qūrylys, ǧylymi zertteu jäne qonaqüi biznesı sekıldı maŋyzdy salalary şeteldık jūmys küşıne täueldı. Mäselen, qonaqüi salasyndaǧy qyzmetkerlerdıŋ jartysynan astamyn şetel azamattary qūraidy.
Sondai-aq bastamanyŋ qabyldanuy Şveisariianyŋ negızgı sauda serıktesı sanalatyn Europalyq odaqpen qarym-qatynasyna äser etuı mümkın degen alaŋdauşylyq bar. Ötken jyly el eksportynyŋ jartysynan astamy EO memleketterıne jöneltılgen.
Aldyn ala jürgızılgen saualnamalarǧa säikes, halyq sanynyŋ ösuın şekteu turaly ūsynys köpşılık qoldauyna ie bolmauy mümkın. Degenmen referendum nätijesı eldıŋ köşı-qon saiasaty men Europalyq odaqpen bailanysyna yqpal etetın maŋyzdy şeşımderdıŋ bırı bolmaq.
