Bügın Astanada ötken «Ädılettı jäne Progressivtı Qazaqstannyŋ Halyqtyq Konstitusiiasy üşın!» Jalpyūlttyq koalisiiasynyŋ otyrysynda Memlekettık keŋesşı Erlan Qarin aldaǧy referendumnyŋ maŋyzy men jaŋa Ata Zaŋnyŋ filosofiiasyna toqtaldy. Ol ūlttyq bırlık pen halyq senımı reformalardyŋ basty qozǧauşy küşı ekenın aitty.
Memlekettık keŋesşı sözın el bırlıgıne qyzmet etudıŋ qadır-qasietın aiqyndaudan bastady.
«Osydan üş jyl būryn Qazaqstan halqy Assambleiasynyŋ kezektı sessiiasynda Memleket basşysy: «El bırlıgın nyǧaitu üşın qyzmet etu – eŋ jauapty ärı sauapty ıs», – degen edı. Prezidenttıŋ osy sözın türlı jiyndarda ünemı qaitalap jüremın. Bırlıkte jäne bırlıkke qyzmet etu – jaqsylyqtyŋ eŋ abzaly. Öitkenı jūmylyp ıstegen ıstıŋ paidasy da, nätijesı de orasan bolady», – dedı Erlan Qarin.
Memlekettık keŋesşı Konstitusiialyq reformanyŋ ūzaq uaqyt boiy jan-jaqty talqylanǧanyn, būl qūjattyŋ bükılhalyqtyq sipatyn erekşe atap öttı.
«7 aidan astam uaqyt boiy daiyndalyp, pysyqtalǧan Konstitusiialyq reforma – qoǧam bırlıgı men halyq yntymaǧynyŋ aiǧaǧy. Būl Jaŋa Ata Zaŋdy äzırleuge myŋdaǧan adam qatysty. Sondyqtan Jaŋa Konstitusiia elımız üşın berekelı qūjat bolady dep senemın», – dedı ol.
Būǧan qosa, Erlan Qarin öŋırlerdegı kezdesulerge toqtalyp, halyqtyŋ reformalarǧa degen yqylasy men Memleket basşysyna degen senımın atap öttı.
«Azamattarymyzdyŋ basym bölıgı Jaŋa Konstitusiiany qoldap otyr. Būl qoldaudyŋ özegınde – Memleket basşysyna jäne onyŋ bastamasymen jüzege asyrylyp jatqan özgerısterge degen ümıt bar. Eger halyq bilıkke senbese, reformalardy bastau da qiyn bolar edı. Tek halyqtyŋ qoldauy bızge osyndai jüielı özgerısterdı jasauǧa küş berıp otyr», – dedı Erlan Qarin.
Sonymen qatar, Memlekettık keŋesşı qoǧamdaǧy pıkır aluandyǧyna toqtalyp, reformany synauşylarǧa qatysty öz oiyn bıldırdı.
«Bügınde elımızdıŋ är azamaty öz oiyn, öz pıkırın erkın aituǧa qūqyly. Sondyqtan, bügınde bolyp jatqan özgerısterdı bıreuler qoldaidy, bıreuler syn aitady, bıreuler sūraq qoiady. Būl – bız qūruǧa ūmtylǧan aşyq qoǧamnyŋ belgısı. Bıraq sol syn aityp jürgender ūlttyq bıregeilıkke, aumaqtyq tūtastyqqa nemese dästürlı qūndylyqtardy qorǧauǧa baǧyttalǧan normalarǧa qarsy bolǧandaryn tüsıne me?!», – dedı ol.
Erlan Qarinnıŋ aituynşa, osyndai taǧdyr şeştı sätte tūtas qoǧamdy artqa tartu – dūrys emes. Ol Jaŋa Konstitusiianyŋ basty missiiasy – saiasi közqarasyna qaramastan, ärbır qazaqstandyqtyŋ qūqyǧyn teŋ qorǧau ekenın tüsındırdı.
«Tüptıŋ tübınde jaŋa Konstitusiia ony qoldaǧandardy da, kümän keltırgenderdı de bärıbır bırdei qorǧap, teŋ kepıldık beredı. Erteŋ bır azamatymyz älemnıŋ bır şetınde qiyn jaǧdaiǧa ūşyrasa, memleket ony jalǧyz qaldyrmaidy. «Är qazaq – jalǧyzym» degen ūlttyq ūranymyz endı «Är azamat – basty qūndylyq» degen konstitusiialyq qaǧidatqa ainaldy», – dep naqtylady Memleket keŋesşı.
Söz soŋynda Erlan Qarin referendum ötkızıletın kündı Jaŋaru künı dep atap, onyŋ tarihi maŋyzyna nazar audardy.
«15 nauryz – būl tek referendum künı emes, būl – Jaŋaru künı. Eger azamattarymyz qoldasa, bız jaŋa däuırge aiaq basamyz. Adamdar tūrǧyn üiden zaŋsyz şyǧarylmaidy, jeke derekter qorǧalady, egemendıktıŋ iesı halyq bolyp tanylady. Jaŋa Konstitusiia ülken jaŋaşyldyqtardyŋ, berekelı ısterdıŋ bastauy bolsyn!», – dep tüiındedı Memlekettık keŋesşı.
