Bügın Aqtöbe oblysynda erekşe oqiǧa oryn aldy. Bır uaqytta 60 ene men 60 kelın dauys beru uchaskesıne kelıp, özderınıŋ belsendı azamattyq ūstanymdaryn körsettı.
Būl bastama ūrpaqtar sabaqtastyǧy men otbasylyq bırlıktıŋ jarqyn körınısıne ainaldy. Ene men kelınnıŋ qatar kelıp, el ömırındegı maŋyzdy oqiǧaǧa bırge qatysuy qoǧamdaǧy yntymaq pen jauapkerşılıktıŋ aiqyn belgısı boldy.
«Bız bügın Tamdy auylynyŋ belsendı äjelerı, analary bolyp öz kelınderımızdı ertıp referendumǧa keldık. Elımızdıŋ jarqyn bolaşaǧy üşın dauys berdık. Sözımızdı jerge tastamaiǧ soŋymzdan erıp, ızımızdı basyp kele jatqan kelınderge rizaşylyǧymyzdy bıldıremız. Elımız aman, jūrtymyz tynyş bolsyn», - dep tılegın aq jaulyqty ana Aqqaǧaz Täjıǧūlova bıldırdı.
Dauys beru uchaskesındegı körınıs erekşe äser qaldyrdy. Merekelık köŋıl-küi, jyly jüzdesu, şynaiy külkı men quanyş atmosferany odan ärı jandandyra tüstı. Mūndai sätter azamattyq belsendılıktıŋ tek mındet qana emes, qoǧamdy bırıktıretın maŋyzdy qūndylyq ekenın körsetedı.
Aqtöbelıkter osylaişa el bolaşaǧyna beijai qaramaitynyn taǧy bır märte däleldep, ortaq jauapkerşılıktı sezınudıŋ ülgısın körsettı.
