Bilık pen qoǧam arasyndaǧy özara senımge negızdelgen jaŋa qoǧamdyq kelısımdı qalyptastyru – «Keŋesıp pışken ton kelte bolmas» atty ūlttyq ūstanymǧa negızdelgen. Sondai-aq, memlekettık basqarudyŋ mazmūny men arhitekturasyn tübegeilı jaŋartu mındetı de qoǧam talqysyna salynyp otyr. Būl turaly Konstitusiialyq komissiianyŋ kezektı otyrysynda Mäjılıs deputaty Janarbek Äşımjan mälımdedı.
«Soŋǧy jyldary qabyldanǧan şeşımder osy maqsatqa jüielı türde qyzmet etıp keledı. Atap aitqanda, būryn bolǧan Prezident kvotalary men taǧaiyndaulardan bas tartu arqyly ökıldı bilıktıŋ derbestıgın küşeituge, saiasi jüienı naqty demokratiialandyruǧa baǧyt aldyq. «Tepe-teŋdık bar jerde tūraqtylyq bar» degen saiasi qaǧidatqa süiensek, jüzege asyrylǧan reformalar bilık tarmaqtary arasyndaǧy teŋgerımdı nyǧaityp, institusionaldyq damudyŋ jaŋa kezeŋın qalyptastyrdy», – dep atap öttı ol.
Mäjılıs deputatynyŋ aituynşa, osy logikanyŋ zaŋdy jalǧasy retınde Qūryltaidyŋ ökılettıkterın keŋeitu mäselesı kün tärtıbıne şyqty. Qūryltaiǧa Konstitusiialyq sotty, Joǧary auditorlyq palatany jäne Ortalyq sailau komissiiasyn qalyptastyruǧa qatysu qūqyǧyn beru – būl instituttardyŋ täuelsızdıgın arttyryp qana qoimai, olardyŋ halyq aldyndaǧy jauapkerşılıgın küşeitedı.
«Däl osy tūsta bız bügın talqylap otyrǧan Halyq keŋesı institutynyŋ maŋyzy aiqyn körınedı. Halyq keŋesı jai ǧana konsultativtık alaŋ emes, memleket pen qoǧam arasyndaǧy jaŋa äleumettık kelısımnıŋ institusionaldyq körınısı. Memlekettık inistituttardyŋ belgılengen reglament aumaǧynda jūmys ısteitını belgılı. Al, Halyq keŋesınıŋ auqymdylyǧy – älgındei alaŋdarda qordalanǧan, jinaqtalǧan türlı ūsynystardy, pıkırlerdı, közqarastardy bır alaŋda toǧystyryp, aitylǧan söz aitylǧan jerde qalmai naqty tetıkke ainaldyru», – dedı J.Äşımjan.
Onyŋ pıkırınşe, barlyq etnostardyŋ müddesın qamtityn Halyq keŋesıne konstitusiialyq negız beru strategiialyq tūrǧydan maŋyzdy. Halyq keŋesı bırtūtas Qazaqstan halqynyŋ müddesıne qyzmet etıp, ışkı saiasat, qoǧamdyq kelısım jäne ūlttyq qūndylyqtar mäselelerı boiynşa käsıbi ūsynystar äzırlei aluy tiıs. Sonymen qatar, oǧan zaŋnamalyq bastama köteru jäne referendum ötkızuge ūsynys beru qūqyǧyn enşıleu basqaru jüiesınıŋ institusionaldyq tūraqtylyǧyn arttyrady.
«Bız ūsynyp otyrǧan özgerıster memlekettıŋ tūraqtylyǧyna salynǧan ūzaqmerzımdı investisiia. Būl – bolaşaq daǧdarystardyŋ aldyn aluǧa, qoǧam men bilık arasyndaǧy senımdı nyǧaituǧa jäne memlekettık basqarudyŋ jaŋa arhitekturasyn qalyptastyruǧa baǧyttalǧan şeşımder. Dana halqymyz «Aqylmen bastalǧan ıs – baiandy bolady» deidı. Osy tūrǧyda, Halyq keŋesı aqyl men jauapkerşılıkke negızdelgen tūraqty saiasi qūrylym. Ol Qazaqstandaǧy saiasi mädeniettıŋ sapalyq jaŋa deŋgeiıne jol aşady», – dep tüiındedı oiyn deputat.
