الماتى قالاسىنداعى المالى اۋداندىق سوتىندا ساياساتكەر ورازالى ەرجانوۆقا قاتىستى العاشقى سوت وتىرىسى ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى ابزال دوستيار الەۋمەتتىك جەلىدەگى پاراقشاسىندا حابارلادى.
جاڭا كونستيتۋتسيا جوباسى بويىنشا رەفەرەندۋم قارساڭىندا ەرجانوۆ «اقىلدى بويكوت» جاريالاۋ باستاماسىن كوتەرگەننەن كەيىن ۇستالعان. بەلسەندى رەفەرەندۋمعا شىعارىلعان قۇجاتتى سىنعا الىپ، ونىمەن كەلىسپەيتىن ازاماتتاردى داۋىس بەرۋگە قاتىسۋدان باس تارتۋعا ۇندەگەن. سونداي-اق، ول ازاماتتاردى رەفەرەندۋم جونىندەگى ورتالىق كوميسسياعا ءوتىنىش جولداپ، ونىڭ تىركەلگەنىن راستايتىن قۇجاتتاردى وزىنە جىبەرۋگە شاقىرعان.
26 اقپانعا قاراعان ءتۇنى ەرجانوۆتىڭ ۇيىندە ءتىنتۋ جۇرگىزىلىپ، كەيىن ول 10 تاۋلىككە قاماۋعا الىنعان. پوليتسيا بۇل ءىستىڭ «سايلاۋ قۇقىقتارىن جۇزەگە اسىرۋعا كەدەرگى كەلتىرۋ» فاكتىسى بويىنشا تەرگەلىپ جاتقانىن مالىمدەدى. قۇقىق قورعاۋ ورگاندارىنىڭ حابارلاۋىنشا، الەۋمەتتىك جەلىلەردە شىندىققا سايكەس كەلمەيتىن اقپارات، رەفەرەندۋمعا بويكوت جاساۋعا شاقىرۋلار جانە شەتەلدىك بايلانىس نومىرلەرىن پايدالانۋ ارقىلى ازاماتتاردى جاڭىلىستىرۋعا باعىتتالعان جاريالانىمدار انىقتالعان.
ال ەرجانوۆتىڭ جاقتاستارى ونىڭ Facebook الەۋمەتتىك جەلىسىندەگى اككاۋنتىنان كونستيتۋتسيانى سىناعان جانە بويكوتقا شاقىرعان جازبالاردىڭ جويىلىپ كەتكەنىن مالىمدەگەن ەدى.
رەفەرەندۋم وتكەننەن كەيىن ساياساتكەردىڭ بۇلتارتپاۋ شاراسى وزگەرتىلىپ، ول ۇيقاماققا اۋىستىرىلعان. قازىرگى ۋاقىتتا سوت پروتسەسى جالعاسىپ جاتىر، ءىس بويىنشا تۇپكىلىكتى شەشىم ءالى جاريالانعان جوق.
