Almaty qalasyndaǧy Almaly audandyq sotynda saiasatker Orazaly Erjanovqa qatysty alǧaşqy sot otyrysy öttı, dep habarlaidy "Adyrna" ūlttyq portaly.
Būl turaly Abzal Dostiiar äleumettık jelıdegı paraqşasynda habarlady.
Jaŋa Konstitusiia jobasy boiynşa referendum qarsaŋynda Erjanov «aqyldy boikot» jariialau bastamasyn kötergennen keiın ūstalǧan. Belsendı referendumǧa şyǧarylǧan qūjatty synǧa alyp, onymen kelıspeitın azamattardy dauys beruge qatysudan bas tartuǧa ündegen. Sondai-aq, ol azamattardy Referendum jönındegı ortalyq komissiiaǧa ötınış joldap, onyŋ tırkelgenın rastaityn qūjattardy özıne jıberuge şaqyrǧan.
26 aqpanǧa qaraǧan tünı Erjanovtyŋ üiınde tıntu jürgızılıp, keiın ol 10 täulıkke qamauǧa alynǧan. Polisiia būl ıstıŋ «sailau qūqyqtaryn jüzege asyruǧa kedergı keltıru» faktısı boiynşa tergelıp jatqanyn mälımdedı. Qūqyq qorǧau organdarynyŋ habarlauynşa, äleumettık jelılerde şyndyqqa säikes kelmeitın aqparat, referendumǧa boikot jasauǧa şaqyrular jäne şeteldık bailanys nömırlerın paidalanu arqyly azamattardy jaŋylystyruǧa baǧyttalǧan jariialanymdar anyqtalǧan.
Al Erjanovtyŋ jaqtastary onyŋ Facebook äleumettık jelısındegı akkauntynan Konstitusiiany synaǧan jäne boikotqa şaqyrǧan jazbalardyŋ joiylyp ketkenın mälımdegen edı.
Referendum ötkennen keiın saiasatkerdıŋ būltartpau şarasy özgertılıp, ol üiqamaqqa auystyrylǧan. Qazırgı uaqytta sot prosesı jalǧasyp jatyr, ıs boiynşa tüpkılıktı şeşım älı jariialanǧan joq.
