الماتى قالاسىنىڭ سوتى Orda.kz اقپاراتتىق پورتالىنىڭ بۇرىنعى باس رەداكتورى گۇلنار باجكەنوۆاعا قاتىستى قىلمىستىق ءىس بويىنشا ۇكىم شىعاردى، دەپ حابارلايدى "ادىرنا" ۇلتتىق پورتالى.
ول 8 جىلعا باس بوستاندىعىنان ايىرىلدى, الايدا جازانى وتەۋ مەرزىمى ەكى جىلعا كەيىنگە شەگەرىلگەن.
سوت باجكەنوۆانى قازاقستان رەسپۋبليكاسى قىلمىستىق كودەكسىنىڭ ءۇش بابى بويىنشا كىنالى دەپ تانىدى. وعان كورىنەۋ جالعان اقپارات تاراتۋ، سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ جانە زاڭسىز كاسىپكەرلىك قىزمەتپەن اينالىسۋ ايىپتارى تاعىلعان.
الماتى قالالىق سوتىنىڭ مالىمەتىنشە، 2024 جىلعى قاراشادان 2025 جىلعى جەلتوقسانعا دەيىن باجكەنوۆا Orda.kz باسشىسى قىزمەتىن اتقارا وتىرىپ، قىزمەتتىك جاعدايىن پايدالانىپ، كومپانيا شوتتارىنان 88,1 ميلليون تەڭگەدەن استام قاراجاتتى يەمدەنگەن.
تەرگەۋ مالىمەتتەرىنە سايكەس، قاراجات باقىلاۋىنداعى جەكە كاسىپكەردىڭ ەسەپشوتىنا جالعان جارنامالىق، كاسىبي جانە عىلىمي قىزمەتتەرگە اقى تولەۋ رەتىندە اۋدارىلعان. سونداي-اق ونىڭ ۇلىنىڭ جەكەمەنشىك حالىقارالىق مەكتەپتە وقۋ اقىسى تولەنگەن.
سوتتا باجكەنوۆانىڭ جەكە كاسىپكەر رەتىندە تىركەلمەگەنىنە قاراماستان، الماتىدا پاتەرلەردى ساتىپ الۋ جانە ساتۋ وپەراتسيالارىنان 121,2 ميلليون تەڭگە كولەمىندە تابىس العانى دا انىقتالعان. سوت ماتەريالدارىنا سايكەس، بۇل تابىس بويىنشا سالىق تولەنبەگەن.
بۇدان بولەك، سوت اقپارات تاراتۋعا قاتىستى سەگىز ەپيزودتى قارادى. سوت مالىمەتىنشە، 2024-2025 جىلدارى باجكەنوۆا الدىن الا ءسوز بايلاسقان ادامدار توبىمەن بىرگە ينتەرنەت-رەسۋرستار مەن الەۋمەتتىك جەلىلەر ارقىلى كورىنەۋ جالعان اقپارات تاراتقان. سوت بۇل ارەكەتتەر ازاماتتاردىڭ، ۇيىمداردىڭ جانە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرگەنىن اتاپ ءوتتى.
ۇكىم بويىنشا باجكەنوۆا بەس جىل مەرزىمگە باق، جۋرناليستيكا، بلوگينگ، جاريا ءىس-شارالار جانە وزگە دە قوعامدىق قىزمەت سالالارىندا جۇمىس ىستەۋ قۇقىعىنان ايىرىلدى. سونىمەن قاتار وعان بۇقارالىق اقپارات قۇرالدارىنا قاتىستى ۇيىمداردا باسشىلىق جانە ماتەريالدىق جاۋاپكەرشىلىگى بار لاۋازىمداردى اتقارۋعا تىيىم سالىندى.
الايدا سوت جازانى وتەۋدى ەكى جىلعا كەيىنگە قالدىردى. بۇل شەشىم سوتتالعان ادامنىڭ 14 جاسقا تولماعان بالاسىنىڭ بولۋىنا بايلانىستى قابىلدانعان.
سونىمەن قاتار سوت باجكەنوۆادان 95 ميلليون 992 مىڭ 350 تەڭگە ماتەريالدىق زالالدى وتەۋدى مىندەتتەدى. بۇعان قوسا، 2 ميلليون 879 مىڭ 770 تەڭگە مەملەكەتتىك باج جانە 6,8 ميلليون تەڭگە كولەمىندە زاڭ كومەگىنە جۇمسالعان شىعىندار مەن جابىرلەنۋشى تاراپتىڭ پروتسەستىك شىعىندارى ءوندىرىلدى.
سوت ۇكىمى ازىرگە زاڭدى كۇشىنە ەنگەن جوق.
ايتا كەتەيىك، 2025 جىلعى 1 جەلتوقساندا الماتىدا گۇلنار باجكەنوۆانىڭ ءۇيى مەن Orda.kz رەداكتسياسىندا ءتىنتۋ جۇرگىزىلگەن. الماتى پوليتسياسى تەرگەۋ ارەكەتتەرىنىڭ جۇرگىزىلگەنىن راستاعان. پوليتسيا مالىمەتىنشە، قىلمىستىق ءىس ازاماتتاردىڭ ارىزدارى نەگىزىندە ينتەرنەتتە كورىنەۋ جالعان اقپاراتتى بىرنەشە رەت جانە قاساقانا تاراتۋ فاكتىلەرى بويىنشا قوزعالعان. تەرگەۋ بارىسىندا باجكەنوۆانىڭ ەلەكتروندى قۇرىلعىلارى مەن بىرقاتار ماتەريالدارى تاركىلەنگەن.
