Almaty qalasynyŋ soty Orda.kz aqparattyq portalynyŋ būrynǧy bas redaktory Gülnar Bajkenovaǧa qatysty qylmystyq ıs boiynşa ükım şyǧardy, dep habarlaidy "Adyrna" ūlttyq portaly.
Ol 8 jylǧa bas bostandyǧynan aiyryldy, alaida jazany öteu merzımı ekı jylǧa keiınge şegerılgen.
Sot Bajkenovany Qazaqstan Respublikasy Qylmystyq kodeksınıŋ üş baby boiynşa kınälı dep tanydy. Oǧan körıneu jalǧan aqparat taratu, senıp tapsyrylǧan böten mülıktı iemdenu nemese ysyrap etu jäne zaŋsyz käsıpkerlık qyzmetpen ainalysu aiyptary taǧylǧan.
Almaty qalalyq sotynyŋ mälımetınşe, 2024 jylǧy qaraşadan 2025 jylǧy jeltoqsanǧa deiın Bajkenova Orda.kz basşysy qyzmetın atqara otyryp, qyzmettık jaǧdaiyn paidalanyp, kompaniia şottarynan 88,1 million teŋgeden astam qarajatty iemdengen.
Tergeu mälımetterıne säikes, qarajat baqylauyndaǧy jeke käsıpkerdıŋ esepşotyna jalǧan jarnamalyq, käsıbi jäne ǧylymi qyzmetterge aqy töleu retınde audarylǧan. Sondai-aq onyŋ ūlynyŋ jekemenşık halyqaralyq mektepte oqu aqysy tölengen.
Sotta Bajkenovanyŋ jeke käsıpker retınde tırkelmegenıne qaramastan, Almatyda päterlerdı satyp alu jäne satu operasiialarynan 121,2 million teŋge kölemınde tabys alǧany da anyqtalǧan. Sot materialdaryna säikes, būl tabys boiynşa salyq tölenbegen.
Būdan bölek, sot aqparat taratuǧa qatysty segız epizodty qarady. Sot mälımetınşe, 2024-2025 jyldary Bajkenova aldyn ala söz bailasqan adamdar tobymen bırge internet-resurstar men äleumettık jelıler arqyly körıneu jalǧan aqparat taratqan. Sot būl äreketter azamattardyŋ, ūiymdardyŋ jäne memlekettıŋ qūqyqtary men zaŋdy müddelerıne eleulı ziian keltırgenın atap öttı.
Ükım boiynşa Bajkenova bes jyl merzımge BAQ, jurnalistika, bloging, jariia ıs-şaralar jäne özge de qoǧamdyq qyzmet salalarynda jūmys ısteu qūqyǧynan aiyryldy. Sonymen qatar oǧan būqaralyq aqparat qūraldaryna qatysty ūiymdarda basşylyq jäne materialdyq jauapkerşılıgı bar lauazymdardy atqaruǧa tyiym salyndy.
Alaida sot jazany öteudı ekı jylǧa keiınge qaldyrdy. Būl şeşım sottalǧan adamnyŋ 14 jasqa tolmaǧan balasynyŋ boluyna bailanysty qabyldanǧan.
Sonymen qatar sot Bajkenovadan 95 million 992 myŋ 350 teŋge materialdyq zalaldy öteudı mındettedı. Būǧan qosa, 2 million 879 myŋ 770 teŋge memlekettık baj jäne 6,8 million teŋge kölemınde zaŋ kömegıne jūmsalǧan şyǧyndar men jäbırlenuşı taraptyŋ prosestık şyǧyndary öndırıldı.
Sot ükımı äzırge zaŋdy küşıne engen joq.
Aita keteiık, 2025 jylǧy 1 jeltoqsanda Almatyda Gülnar Bajkenovanyŋ üiı men Orda.kz redaksiiasynda tıntu jürgızılgen. Almaty polisiiasy tergeu äreketterınıŋ jürgızılgenın rastaǧan. Polisiia mälımetınşe, qylmystyq ıs azamattardyŋ aryzdary negızınde internette körıneu jalǧan aqparatty bırneşe ret jäne qasaqana taratu faktılerı boiynşa qozǧalǧan. Tergeu barysynda Bajkenovanyŋ elektrondy qūrylǧylary men bırqatar materialdary tärkılengen.
