تۇركىستان قالاسىندا قىز بالانى زورلادى دەگەن كۇدىكپەن پوليتسەيلەر ۇستالدى، دەپ حابارلايدى “ادىرنا” ۇلتتىق پورتالى.
18 جاستاعى تۇرعىنىنىڭ ارىزى نەگىزىندە جىنىستىق قاتىناسقا ماجبۇرلەۋ فاكتىسى بويىنشا قىلمىستىق ءىس قوزعالدى.
جەلىدە جاريالانعان مالىمەتكە سايكەس، اتالعان قىزمەتكەرلەر زورلاۋ دەرەگى بويىنشا كۇدىككە ءىلىنىپ، قىزمەتتەن بوساتىلعان.
اتالعان جاعدايعا بايلانىستى ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ پىكىر ءبىلدىردى.
«تۇركىستان قالاسىنىڭ 18 جاستاعى تۇرعىنىنىڭ ارىزى نەگىزىندە جىنىستىق قاتىناسقا ماجبۇرلەۋ دەرەگى بويىنشا قىلمىستىق ءىس قوزعالدى. قازىرگى ۋاقىتتا بۇرىنعى پوليتسيا قىزمەتكەرلەرىنىڭ بۇل وقيعاعا ىقتيمال قاتىسى تولىق كولەمدە تەكسەرىلۋدە. سوتقا دەيىنگى تەرگەپ-تەكسەرۋ اياسىندا ولاردىڭ ارەكەتتەرىنە ءپرينتسيپتى قۇقىقتىق باعا بەرىلەتىن بولادى»، – دەدى ول.
مينيسترلىكتىڭ مالىمەتىنشە، جۇرگىزىلگەن قىزمەتتىك تەكسەرۋ ناتيجەسىندە اتالعان قىزمەتكەرلەر ىشكى ىستەر ورگاندارىنان قىزمەتتىك بەدەلگە نۇقسان كەلتىرگەنى ءۇشىن، تەرىس سەبەپتەرمەن جۇمىستان بوساتىلعان.
«قازىر وقيعانىڭ بارلىق ءمان-جايىن جان-جاقتى، تولىق ءارى وبەكتيۆتى انىقتاۋعا باعىتتالعان قاجەتتى تەرگەۋ ارەكەتتەرىنىڭ كەشەنى جۇرگىزىلۋدە. تەرگەۋ بارىسى ىشكى ىستەر ءمينيسترىنىڭ ەرەكشە باقىلاۋىندا»، – دەپ مالىمدەدى مينيسترلىك وكىلى.
