قازاقستان رەسپۋبليكاسى كونستيتۋتسياسىنىڭ جوباسىندا وتباسى مەن بالا قۇقىعىن قورعاۋ نورمالارى ساقتالىپ قانا قويماي، ايتارلىقتاي كۇشەيتىلگەن. سونىمەن قاتار نەكە ينستيتۋتىن نىعايتۋعا، اتا-انالاردىڭ جاۋاپكەرشىلىگىن ارتتىرۋعا جانە بالانىڭ قۇقىعىن قامتاماسىز ەتۋگە باعىتتالعان جاڭا ەرەجەلەر ەنگىزىلىپ وتىر. بۇل تۋرالى كونستيتۋتسيالىق كوميسسيانىڭ كەزەكتى وتىرىسىندا قازاقستانداعى بالا قۇقىقتارى جونىندەگى ۋاكىل دينارا زاكيەۆا مالىمدەدى.
كونستيتۋتسيا جوباسىنىڭ 27-بابىندا قولدانىستاعى رەداكتسياداعىداي، نەكە مەن وتباسى، انا، اكە جانە بالا مەملەكەتتىڭ قورعاۋىندا ەكەنى، ال بالالارعا قامقورلىق جاساۋ مەن ولاردى تاربيەلەۋ اتا-انانىڭ تابيعي قۇقىعى ءارى مىندەتى ەكەنى بەكىتىلگەن.
«بۇل نورمالار دەكلاراتيۆتى تۇرعىدا ەمەس، ناقتى قولدانبالى سيپاتقا يە. ولار مەملەكەتتىك ساياساتتىڭ نەگىزىنە اينالىپ، بالا قۇقىقتارىن قورعاۋ سالاسىنداعى كۇندەلىكتى جۇمىسىمىزعا ارقاۋ بولىپ وتىر. بالالاردى قورعاۋ ماسەلەسىندە شەشىم قابىلداعاندا نەمەسە ۇستانىمىمىزدى قورعاعاندا ءبىز ءدال وسى كونستيتۋتسياداعى تۇبەگەيلى قاعيداتتارعا سۇيەنەمىز»، – دەدى دينارا زاكيەۆا.
كوميسسيا مۇشەسىنىڭ ايتۋىنشا، كونستيتۋتسيالىق نورمالار ومىردە ناقتى كورىنىس تابۋدا. تەك وتكەن جىلدىڭ وزىندە مەملەكەت تاراپىنان 51 مىڭنان استام وقيعا كەزىندە قاۋىپ-قاتەر دەر كەزىندە انىقتالدى. الدىن الۋ شارالارى جۇرگىزىلىپ، بالالاردىڭ قۇقىقتىق قورعالۋى قامتاماسىز ەتىلگەن.
بالالاردى قورعاۋ تەك داعدارىس جاعدايلارىندا ارەكەت ەتۋمەن شەكتەلمەيدى. ول سونداي-اق بالالاردى الەۋمەتتىك قولداۋعا، دەنساۋلىق ساقتاۋ، ءبىلىم مەن تاربيە بەرۋ ىسىنە، قاۋىپسىزدىگىنە جانە وتباسىندا ءومىر ءسۇرۋ قۇقىعىنا كەپىلدىك بەرۋدى قامتيدى. بۇل ۇدەرىستە بالانىڭ ءال-اۋقاتىنىڭ نەگىزگى تىرەگى رەتىندە وتباسى مەن اتا-انانىڭ جاۋاپتى قامقورلىعىنا ەرەكشە ءمان بەرىلەدى.
دينارا زاكيەۆا كوميسسيانىڭ الدىڭعى وتىرىستارىنىڭ بىرىندە ەلنۇر بەيسەنباەۆتىڭ نەكەنى ەر مەن ايەلدىڭ ەرىكتى ءارى تەڭ قۇقىقتى، زاڭعا سايكەس مەملەكەت تىركەيتىن وداعى رەتىندە كونستيتۋتسيادا بەكىتۋ جونىندەگى ۇسىنىسىن ەسكە سالدى.
«بۇل نورما قازاقستاندىق قوعامنىڭ قۇندىلىقتارىنا نەگىزدەلگەن جانە تۇراقتى دامۋعا مۇددەلى كەز كەلگەن مەملەكەت ءۇشىن وبەكتيۆتى قاجەتتىلىك. نەكەنى مىندەتتى تۇردە مەملەكەتتىك تىركەۋ تۋرالى تالاپ بالالاردىڭ قۇقىقتارىن ءتيىمدى قورعاۋعا مۇمكىندىك بەرەدى. مەن بۇل نورمانى قولدايمىن»، – دەدى ول.
سونىمەن قاتار كونستيتۋتسيا جوباسىندا ءبىلىم بەرۋ جۇيەسىنىڭ زايىرلى سيپاتىن بەكىتەتىن جاڭا نورماعا دا ەرەكشە كوڭىل بولىنگەن.
«قازاقستان رەسپۋبليكاسىنىڭ اۋماعىنداعى ءبىلىم بەرۋ ۇيىمدارىندا وقۋ مەن تاربيە بەرۋ جۇيەسى، ءدىني ءبىلىم بەرۋ ۇيىمدارىن قوسپاعاندا، زايىرلى سيپاتتا بولۋى ءتيىس. بۇل بالالاردىڭ ءبىلىم الۋعا دەگەن قۇقىعىن تولىق جۇزەگە اسىرۋىنا جاعداي جاسايدى»، – دەپ تۇيىندەدى بالا قۇقىقتارى جونىندەگى ۋاكىل.
