تۇركىستان وبلىستىق ءماسليحاتىنىڭ دەپۋتاتى نۇرايىم شاقيمەرگەن بالاسىن كوتەرىپ، ساكەن سەيفۋللين اتىنداعى مەكتەپتەگى سانيتارلىق جاعدايدى تەكسەرۋگە باردى.
دەپۋتاتتىڭ ايتۋىنشا، وقۋ ورنىنداعى احۋالعا بايلانىستى تۇرعىنداردان بىرنەشە شاعىم تۇسكەن. تەكسەرۋ بارىسىندا سىنىپتاردىڭ دارەتحانامەن ىرگەلەس ورنالاسقانى، سونداي-اق دارەتحانادان تارايتىن وتكىر ءيىستىڭ بالالاردىڭ وقۋىنا كەدەرگى كەلتىرىپ وتىرعانى انىقتالعان.
نۇرايىم شاقيمەرگەن بۇل ماسەلەنىڭ بالالاردىڭ دەنساۋلىعىنا جانە سانيتارلىق-گيگيەنالىق تالاپتارعا قايشى ەكەنىن اتاپ ءوتتى. اتالعان جاعداي بويىنشا دەپۋتاتتىق ساۋال جولدانىپ، ماسەلە باقىلاۋعا الىنعان.
سونداي-اق دەپۋتات تەكسەرۋگە بالاسىن بىرگە اپارۋىنا ءماجبۇر بولعانىن ايتتى. ونىڭ سوزىنشە، بالا كۇتۋشىنىڭ سىرقاتتانۋىنا بايلانىستى بالاسىن قالدىراتىن ادام بولماعان.
نۇرايىم شاقيمەرگەن ءوزىنىڭ جالعىزباستى انا ەكەنىن اتاپ ءوتىپ، سوعان قاراماستان حالىق الدىنداعى جاۋاپكەرشىلىكتى كەيىنگە شەگەرمەۋدى ءجون كورگەنىن جەتكىزدى. ونىڭ ايتۋىنشا، كەي جاعدايلاردا بالاسىمەن بىرگە قوعامدىق قىزمەت اتقارۋعا تۋرا كەلەدى.
"بۇرىن جالعىزباستى انالاردى اياۋشى ەدىم. قازىر ءوزىم سول قاتارعا قوسىلدىم.
بىراق سەزىمىم مۇلدە باسقا. تۇسىنگەنىم ، جالعىزباستى انالار ءالسىز ەمەس. ولار ەشكىمگە ايتپايتىن، ەشكىمگە كورسەتپەيتىن ناعىز كۇشتىڭ يەسى. سەبەبى قانداي جاعدايدا دا توقتاپ قالمايتىنىن ءوز باسىمنان وتكەرىپ ءجۇرمىن.
سول كۇنى بالا كۇتۋشى اۋىرىپ قالدى.
بالام وزگە ەشكىمگە كونبەيدى. ال حالىقپەن كەزدەسۋ كەيىنگە شەگەرىلمەۋى كەرەك، سەبەبى ۇلكەن جاۋاپكەرشىلىك. سوندىقتان كەي ساتتەردە بالاممەن بىرگە ەلگە قىزمەت ەتەمىن", - دەدى ول.
