يزرايل قورعانىس ارمياسى (تساحال) يزرايل كۇشتەرى مەن پالەستينالىق راديكالدى يسلامشىل حاماس قوزعالىسى اراسىنداعى سوعىس كەزىندە گازا سەكتورىندا شامامەن 70 مىڭ ادام قازا تاپقانىن العاش رەت رەسمي تۇردە راستادى. بۇل تۋرالى 29 قاڭتاردا The Jerusalem Post جانە The Times of Israel باسىلىمدارى جازدى، دەپ حابارلايدى “ادىرنا”.
تساحال مالىمەتىنشە، وسى ساننىڭ شامامەن 25 مىڭى حاماس جاۋىنگەرلەرى بولعان. يزرايل ارمياسى 2024 جىلدىڭ العاشقى ايلارىنا دەيىن حاماس تاراپىنان گازادان اتىلعان زىمىرانداردىڭ شامامەن 13 پايىزى تەحنيكالىق اقاۋلارعا بايلانىستى سەكتور اۋماعىنا قۇلاپ، سونىڭ سالدارىنان كوپتەگەن پالەستينالىقتاردىڭ قازا تاپقانىن مالىمدەدى.
تساحال باعالاۋىنشا، حاماس كۇشتەرى يزرايلمەن ىنتىماقتاستىق جاسادى دەپ كۇدىكتەلگەن نەمەسە گازانىڭ كەيبىر اۋداندارىنان كەتۋگە تىرىسقان، سونداي-اق ساياسي قارسىلاس دەپ ەسەپتەلگەن كوپتەگەن پالەستينالىقتاردى وزدەرى جازالاپ، ولتىرگەن. قازىرگى ۋاقىتتا تساحال قازا تاپقان بەيبىت تۇرعىندار مەن جاۋىنگەرلەردىڭ ناقتى اراقاتىناسىن، سونداي-اق حاماس وكىلدەرى ولتىرگەن ادامداردىڭ سانىن انىقتاۋ ۇستىندە.
گازا دەنساۋلىق ساقتاۋ مينيسترلىگىنىڭ مالىمەتى بويىنشا، قازىرگى تاڭدا قازا تاپقاندار سانى 71 667 ادامدى قۇرايدى، ونىڭ ىشىندە 2025 جىلدىڭ قازانىنداعى اتىستى توقتاتۋ كەلىسىمىنەن كەيىن ولتىرىلگەن 450-دەن استام ادام بار. ۆەدومستۆو تابىلعان مايىتتەردىڭ 90 پايىزدان استامىنىڭ جەكە باسىن انىقتاعانىن حابارلادى. الايدا ستاتيستيكانىڭ قالاي جاسالعانىن، ونىڭ ىشىندە قازا تاپقاندار اراسىندا قانشا يسلامشىل جاۋىنگەر بار ەكەنىن نەمەسە اۋرۋحانالاردا تابيعي سەبەپتەرمەن قايتىس بولعان پالەستينالىقتار ەسەپكە الىنعان-الىنباعانىن ناقتىلامادى.
ەسكە سالساق، تاياۋ شىعىستاعى جاعداي 2023 جىلعى 7 قازانىندا كۇرت شيەلەنىستى. ەۋروپالىق وداق پەن اقش-تا تەرروريستىك ۇيىم دەپ تانىلعان راديكالدى يسلامشىل حاماس قوزعالىسى يزرايلگە جاپپاي شابۋىل جاسادى. جاۋىنگەرلەر يزرايلگە جاپپاي زىمىران سوققىسىن بەرىپ، ەل اۋماعىنا باسىپ كىرىپ، قازىرگى يزرايل مەملەكەتى تاريحىنداعى بەيبىت تۇرعىندارعا قارسى ەڭ جاپپاي قىرعىندى جۇزەگە اسىردى — شامامەن 1200 ادام قازا تاپتى. سونداي-اق 250-گە جۋىق ادام كەپىلگە الىنىپ، گازا سەكتورىنا اكەتىلدى. كەپىلگە الىنعانداردىڭ ءبىر بولىگى ايىرباس نەمەسە بوساتۋ ارقىلى ەركىندىككە شىقتى، ءبىر بولىگى قازا تاپتى.
“بۇعان جاۋاپ رەتىندە يزرايل حاماس-قا قارسى سوعىس جاريالادى. قۇرلىقتاعى وپەراتسيالار مەن گازا سەكتورىن بومبالاۋ بارىسىندا شامامەن 170 مىڭ ادام جارالاندى”، -دەپ مالىمدەدى حاماس باقىلاۋىنداعى دەنساۋلىق ساقتاۋ مينيسترلىگى.
حاماس ەۋروپالىق وداقتا، ۇلىبريتانيادا جانە اقش-تا تەرروريستىك ۇيىم دەپ تانىلعان.
2025 جىلدىڭ قازانىندا يزرايل بيلىگى مەن حاماس اقش پرەزيدەنتى دونالد ترامپتىڭ اكىمشىلىگى ازىرلەگەن بەيبىت جوسپار اياسىندا اتىستى توقتاتۋعا كەلىستى. كەلىسىمدەردىڭ ورىندالۋىنا اقش، تۇركيا، كاتار جانە مىسىر كەپىلگەر بولدى. ءبىرىنشى كەزەڭدە حاماس ءتىرى قالعان بارلىق يزرايلدىك كەپىلگە الىنعانداردى يزرايل تۇرمەلەرىندەگى پالەستينالىق تۇتقىنداردى بوساتۋعا ايىرباستادى.
قاڭتار ايىنىڭ ورتاسىندا اق ءۇي ترامپتىڭ گازا سەكتورىنداعى سوعىس قيمىلدارىن اياقتاۋعا باعىتتالعان جوسپارىنىڭ ەكىنشى كەزەڭى باستالعانىن مالىمدەدى. بۇل كەزەڭدە ءوڭىردى ۋاقىتشا باسقارۋ ءۇشىن «بەيبىتشىلىك كەڭەسى» جانە وعان باعىناتىن ۇلتتىق كوميتەت قۇرىلۋى ءتيىس، كەيىن بۇل مىندەتتى پالەستينا ۇلتتىق اكىمشىلىگى ءوز قولىنا الماق.
