بۇگىن گازا سەكتورىنان مىسىرعا ەۆاكۋاتسيالانعان قازاقستاندىقتار كايرگە كەلدى. ولار قوناقۇيگە ورنالاستىرىلدى، دەپ حابارلايدى "ادىرنا" پورتالى.
«قازاقستاندىق ديپلوماتتار مەن حالىقارالىق ۇيىمداردىڭ قىزمەتكەرلەرى ولارعا بارلىق قاجەتتى كومەكتى، سونىڭ ىشىندە پسيحولوگيالىق قولداۋدى كورسەتۋدە. بۇل رەتتە وتانداستارىمىز بەن ولاردىڭ وتباسى مۇشەلەرىن قۇجاتتاندىرۋ ماسەلەلەرى شەشىلۋدە»، - دەپ حابارلادى قر سىرتقى ىستەر مينيسترلىگىنىڭ ءباسپاسوز قىزمەتى.
ەستەرىڭىزگە سالا كەتەيىك، 15 قاراشادا گازا سەكتورىندا بولعان قازاقستاندىقتاردى ەۆاكۋاتسيالاۋدىڭ ءبىرىنشى كەزەڭى وتكەن بولاتىن. 92 ادام رافاح باقىلاۋ-وتكىزۋ بەكەتى ارقىلى مىسىر اۋماعىنا ءوتتى.
ءبىزدىڭ وتانداستارىمىز بەن ولاردىڭ وتباسى مۇشەلەرى قازاقستاننىڭ قالعان ازاماتتارى مەملەكەت تەرريتورياسىنان شىعارىلعانشا كايردە بولادى. سودان كەيىن ولاردىڭ ارتىنان ەۆاكۋاتسيالىق كوميسسيا جىبەرىلەدى.
