فوتو: كوممەرسانت
رەسەي استاناسى ماسكەۋدە 5 قازان كۇنى اۋعانستان ماسەلەسى بويىنشا كەڭەستەردىڭ VIII وتىرىسى ءوتتى، دەپ حابارلايدى “ادىرنا” ينتەرفاكسقا سىلتەپ.
كەزدەسۋگە ورتالىق جانە وڭتۇستىك ازيانىڭ ون مەملەكەتىنىڭ جوعارى لاۋازىمدى وكىلدەرى قاتىستى.
رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆانىڭ ايتۋىنشا، تاراپتار اۋعانستانمەن ساياسي جانە ەكونوميكالىق ىنتىماقتاستىقتى، سونداي-اق تەرروريزم مەن ەسىرتكىنىڭ زاڭسىز اينالىمىنا قارسى وڭىرلىك ءوزارا ءىس-قيمىلدى تالقىلاعان.
كەزدەسۋگە قازاقستان، ءۇندىستان، يران، قىتاي، قىرعىزستان، پاكىستان، رەسەي، تاجىكستان جانە وزبەكستاننىڭ ارنايى وكىلدەرى قاتىستى. اۋعانستاننىڭ سىرتقى ىستەر ءمينيسترى ءامىر حان موتتاكي قورىتىندى قۇجاتقا قول قويۋدان باس تارتتى.
رەسەيدىڭ اۋعانستان بويىنشا ارنايى وكىلى زامير كابۋلوۆتىڭ ايتۋىنشا، موتتاكي قۇجات ماتىنىندە اۋعانستاننىڭ «تەرروريزم كونتەكستىندە تىم ءجيى اتالۋىنا» نارازىلىق بىلدىرگەن.
كەزدەسۋ بارىسىندا رەسەي سىرتقى ىستەر ءمينيسترى سەرگەي لاۆروۆ «تاليباننىڭ» اۋعانستاندى قالپىنا كەلتىرۋدەگى جۇمىسىنا وڭ باعا بەرىپ، ەسىرتكى جانە تەرروريزممەن كۇرەستەگى جەتىستىكتەرىن اتاپ ءوتتى.
ايتا كەتەيىك، ماسكەۋ فورماتىنداعى كەڭەستەر رەسەيدىڭ باستاماسىمەن 2017 جىلى قۇرىلعان. 2025 جىلى رەسەي «تاليباندى» تەرروريستىك ۇيىمدار تىزىمىنەن شىعارعان.
