وبلىس اكىمى ناريمان تورەعاليەۆتىڭ توراعالىعىمەن جاڭا كونستيتۋتسيا جوباسىن تالقىلاۋ جونىندەگى القا وتىرىسى ءوتتى. جيىنعا مەملەكەتتىك جانە قۇقىق قورعاۋ ورگاندارىنىڭ جەتەكشىلەرى، ءماسليحات دەپۋتاتتارى، ۇكىمەتتىك ەمەس ۇيىم مۇشەلەرى، زيالى قاۋىم، جوعارى وقۋ ورىندارىنىڭ رەكتورلارى، بيزنەس-قاۋىمداستىق جانە باق وكىلدەرى قاتىستى. اۋدان اكىمدەرى سەلەكتورلىق رەجيم ارقىلى قوسىلدى.
ايماق باسشىسى جاڭا كونستيتۋتسيانى قابىلداۋ «ادىلەتتى قازاقستان» قاعيداتتارىن ورنىقتىرۋ جولىنداعى ماڭىزدى ءارى تاريحي قادام ەكەنىن ەرەكشە اتاپ ءوتتى.
- مەملەكەت باسشىسى قاسىم-جومارت كەمەلۇلى باستاماشى بولعان كونستيتۋتسيالىق رەفورما ەلىمىزدىڭ بولاشاق دامۋ باعىتىن ايقىندايدى. كونستيتۋتسيالىق كوميسسيانىڭ جۇمىسى جاريا جۇرگىزىلىپ، ناتيجەسىندە حالىق نازارىنا تۇزەتۋلەر جوباسى ۇسىنىلدى. ەندەشە ەل تاعدىرىنداعى ەلەۋلى وقيعاعا بايلانىستى تالقىلاۋلار دا تەرەڭ، بايىپتى ءارى سىندارلى بولۋى ماڭىزدى، - دەدى وبلىس اكىمى.
وبلىستىق قوعامدىق كەڭەستىڭ توراعاسى باۋىرجان اتاۋوۆ زاڭ شىعارۋعا باستاماشىلىق ەتە الاتىن جاڭا ينستيتۋت - حالىق كەڭەسىنىڭ قۇرىلۋى جانە ارنايى زاڭمەن رەتتەلۋى ازاماتتىق قوعامنىڭ الەۋەتىن ارتتىراتىن باتىل باستاما ەكەنىن جەتكىزدى.
جۋرناليست، قر پرەزيدەنتى جانىنداعى ۇلتتىق قۇرىلتايدىڭ مۇشەسى باۋىرجان عۇبايدۋللين ۆيتسە-پرەزيدەنتتى ءوز وكىلەتتىگىن اتقارۋ كەزەڭىندە ەشقانداي پارتيادا بولماۋعا مىندەتتەۋ ساياسي ۇيىمداردىڭ تەڭ دامۋ جاعدايىن قامتاماسىز ەتۋگە، ءوزارا باسەكەلەستىكتى ارتتىرۋعا مۇمكىندىك بەرەتىنىن اتاپ ءوتتى.
«AMANAT» پارتياسى وبلىستىق فيليالىنىڭ اتقارۋشى حاتشىسى ازامات سافيماليەۆ، قحپ وبلىستىق فيليالىنىڭ توراعاسى بوريس لاۆرەنتەۆ تاعدىرشەشتى ماسەلەلەردى حالىقتىڭ تالقىسىنان وتكىزۋدەگى باتىل بەتبۇرىستارعا وڭ باعا بەرىپ، قوعام مۇشەلەرىن ازاماتتىق جاۋاپكەرشىلىك تانىتۋعا شاقىردى.
قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ پرورەكتورى جانار دوسقازيەۆا العاش رەت ازاماتتاردىڭ جەكە دەرەكتەرىنىڭ تسيفرلىق ورتادا قورعالۋىن قامتاماسىز ەتۋ مىندەتى نەگىزگى قۇجاتقا ەنگىزىلگەنى اتا زاڭنىڭ ۋاقىت تالابىنا ساي وزگەرگەنىن ايعاقتايتىنىن ايتتى.
جيىن سوڭىندا وبلىس اكىمى جاۋاپتى ورگاندارعا جاڭا كونستيتۋتسيا جوباسىن حالىققا جان-جاقتى ءتۇسىندىرۋ جۇمىستارىن كۇشەيتۋدى تاپسىرىپ، قوعام وكىلدەرىن بەلسەندىلىك تانىتۋعا شاقىردى.
