الماتى وبلىسىندا قازاقستان رەسپۋبليكاسىنىڭ جاڭا كونستيتۋتسياسىنىڭ جوباسىن تالقىلاۋعا ارنالعان وبلىس اكتيۆىنىڭ وتىرىسى ءوتتى. وبلىس اكىمى مارات سۇلتانعازيەۆ توراعالىق ەتكەن جيىنعا وبلىستىق ءماسليحات توراعاسى، وبلىس اكىمىنىڭ ورىنباسارلارى، اۋدان جانە قالا اكىمدەرى، دەپارتامەنتتەر مەن باسقارمالاردىڭ باسشىلارى، قۇقىق قورعاۋ ورگاندارىنىڭ وكىلدەرى، ءىرى كاسىپورىن جەتەكشىلەرى مەن جەرگىلىكتى بۇقارالىق اقپارات قۇرالدارىنىڭ وكىلدەرى قاتىستى.
ءوڭىر اكتيۆى جاڭا اتا زاڭ قابىلدانعان جاعدايدا بيلىكتىڭ حالىق الدىنداعى جاۋاپكەرشىلىگى كۇشەيىپ، ەلدىڭ ساياسي جۇيەسى تولىق جاڭاراتىنىن اتاپ ءوتتى.
«كونستيتۋتسيالىق رەفورما اياسىنداعى وزگەرىستەر قوعام مەن زامان تالابىنا ساي ساياسي جۇيەنى جاڭارتۋعا باعىتتالعان: مەملەكەتتىك باسقارۋ اشىق بولا تۇسەدى، شەشىم قابىلداۋ ساپاسى ارتادى، ازاماتتاردىڭ مەملەكەتكە دەگەن سەنىمى نىعايادى. سونىمەن قاتار ادىلەتتىلىك، زاڭ ۇستەمدىگى، بىرلىك پەن كەلىسىم، ەگەمەندىك پەن اۋماقتىق تۇتاستىق، تابيعاتقا جاۋاپكەرشىلىكپەن قاراۋ قاعيداتتارى كونستيتۋتسيالىق دەڭگەيدە بەكىتىلەدى. ەڭ باستىسى – بۇل وزگەرىستەردى حالىقتىڭ ءوزى قابىلدايدى. كونستيتۋتسيانىڭ جاڭا رەداكتسياسى جالپىحالىقتىق رەفەرەندۋم ارقىلى بەكىتىلىپ، ءاربىر ازاماتقا سانالى تاڭداۋ جاساۋعا مۇمكىندىك بەرىلەدى»، – دەدى وبلىس اكىمى مارات سۇلتانعازيەۆ.
جاڭا جوبا اياسىنداعى نەگىزگى جاڭالىقتاردىڭ ءبىرى – 145 دەپۋتاتتان تۇراتىن ءبىر پالاتالى پارلامەنت، ياعني قۇرىلتاي ينستيتۋتىن ەنگىزۋ. سونداي-اق مەملەكەتتىك باسقارۋ جۇيەسىنە ۆيتسە-پرەزيدەنت ينستيتۋتىن ەنگىزۋ ۇسىنىلىپ وتىر.
تاراپتار كونستيتۋتسيالىق رەفورما اياسىندا ۇسىنىلعان وزگەرىستەردى حالىقپەن كەزدەسۋلەردە جانە قوعامدىق الاڭداردا قاراپايىم ءارى تۇسىنىكتى تىلمەن جەتكىزۋدىڭ ماڭىزدىلىعىنا نازار اۋداردى. سونىمەن قاتار وبلىس اكىمى كونستيتۋتسيالىق رەفورما جونىندەگى كوميسسيا قۇرامىنا الماتى وبلىسىنان وبلىستىق ءماسليحات توراعاسى قۋات بايعوجاەۆ مۇشە ەكەنىن ەرەكشە اتاپ ءوتتى.
