كونستيتۋتسيالىق رەفورما جونىندەگى كوميسسيانىڭ كەزەكتى وتىرىسىندا ءماجىلىس دەپۋتاتى، «اق جول» پارتياسى فراكتسياسىنىڭ جەتەكشىسى ازات پەرۋاشەۆ بيلىك تارماقتارى اراسىنداعى وكىلەتتىكتەر تەڭگەرىمى تۋرالى پىكىر ءبىلدىردى.
دەپۋتاتتىڭ ايتۋىنشا، بۇل ماسەلە مەملەكەت باسشىسىنىڭ 2025 جىلعى 8 قىركۇيەكتەگى قازاقستان حالقىنا جولداۋىن جۇزەگە اسىرۋ اياسىندا بىلتىر قازان ايىندا قۇرىلعان پارلامەنتتىك رەفورما جونىندەگى جۇمىس توبىنىڭ ارنايى وتىرىسىندا جان-جاقتى تالقىلانعان.
«سول كەزدە-اق ءبىز پرەزيدەنت پەن قۇرىلتاي وكىلەتتىكتەرىن ناقتى اجىراتۋ تاسىلدەرىن تالقىلاپ، ورتاق ۇستانىم قالىپتاستىردىق. وسى تۇرعىدان العاندا، دايىندالعان جاڭا كونستيتۋتسيا جوباسىندا بۇل وكىلەتتىكتەر جەتكىلىكتى دارەجەدە تەڭگەرىمدى بولىنگەن دەپ ەسەپتەيمىن»، – دەدى ازات پەرۋاشەۆ.
ونىڭ سوزىنشە، پرەزيدەنت رەسپۋبليكاداعى ەڭ جوعارى لاۋازىمدى تۇلعا رەتىندە بيلىكتىڭ بارلىق تارماعى – زاڭ شىعارۋشى (قۇرىلتاي), اتقارۋشى (ۇكىمەت) جانە سوت بيلىگىنىڭ ۇيلەسىمدى جۇمىس ىستەۋىن قامتاماسىز ەتەدى.
«سوندىقتان پرەزيدەنت پەن قۇرىلتاي اراسىنداعى ءوزارا قاتىناستى “ساياسي مونوپوليانى ساقتاۋ نەمەسە كۇشەيتۋ” دەپ باعالاۋ – كونستيتۋتسيالىق رەفورمانىڭ ءمانىن بۇرمالاۋ. پرەزيدەنت پەن قۇرىلتايدىڭ ءوزارا قاتىناسى – ءارتۇرلى بيلىك تارماقتارىنىڭ ەمەس، تۇتاس بيلىكتىڭ حالىق الدىنداعى جاۋاپكەرشىلىگى ينستيتۋتى مەن سول بيلىك تارماعىنىڭ ءبىرىنىڭ اراسىنداعى قاتىناس»، – دەدى دەپۋتات.
ول ازىرلەنگەن اتا زاڭ جوباسى بيلىكتىڭ ءبىر تارماعىن ەكىنشىسىنەن جوعارى قويۋدى كوزدەمەيتىنىن اتاپ ءوتتى. جاڭا كونستيتۋتسيادا وكىلەتتىكتەر نەعۇرلىم تەڭ ءارى ۇيلەسىمدى تۇردە بولىنگەن جۇيە قالىپتاستىرىلادى.
«بۇل جاڭا ساياسي جۇيە ارقىلى جۇزەگە اسادى. قوعام مۇددەسىن ءبىلدىرۋ فۋنكتسيالارى حالىق كەڭەسىن قۇرۋ ارقىلى كەڭەيتىلەدى، ال قۇرىلتاي كاسىبي زاڭ شىعارۋ قىزمەتىنە تولىقتاي شوعىرلانىپ، بارلىق زاڭنامالىق وكىلەتتىككە يە بولادى»، – دەپ اتاپ ءوتتى ازات پەرۋاشەۆ.
سونداي-اق، ول ۇسىنىلعان شەشىمدەر پرەزيدەنتتىڭ وكىلەتتىگىن كەڭەيتپەيتىنىنە توقتالدى. كەرىسىنشە، قازىرگى زامان تالاپتارى مەن ەلىمىزدىڭ ۇلتتىق مۇددەلەرىن ىلگەرىلەتۋ قاجەتتىلىگىن ەسكەرە وتىرىپ، بۇرىن بولعان قۇقىقتىق ولقىلىقتاردى تولتىرادى.
«بۇل رەفورما ءوز يدەولوگياسى جاعىنان 2022 جىلعى كونستيتۋتسيالىق رەفورمانىڭ لوگيكالىق جالعاسى جانە ونى جاڭا ساپالىق دەڭگەيدە دامىتۋ بولىپ تابىلادى. سول كەزدە-اق پرەزيدەنتتىڭ پارلامەنتكە ىقپالىن شەكتەيتىن نورمالار ەنگىزىلدى. اتاپ ايتقاندا، پرەزيدەنتتىڭ پارتيا مۇشەسى بولۋىنا تىيىم سالىندى. بۇل قۇرىلتايدىڭ پارتيالىق ءتىزىم بويىنشا سايلانۋى جاعدايىندا زاڭ شىعارۋشى ورگاننىڭ تاۋەلسىزدىگىن كۇشەيتەدى»، – دەدى سپيكەر.
ازات پەرۋاشەۆتىڭ پىكىرىنشە، پارلامەنتكە بىرقاتار جوعارى لاۋازىمدى تۇلعالاردى تاعايىنداۋعا كەلىسىم بەرۋ وكىلەتتىگىنىڭ بەرىلۋى، سونداي-اق ازاماتتاردىڭ كونستيتۋتسيالىق قۇقىقتارىن قورعاۋ كەپىلدىكتەرىنىڭ كۇشەيۋى «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى اياسىندا وكىلەتتىكتەر تەڭگەرىمىنىڭ نىعايعانىن ايقىن كورسەتەدى.
وسىعان بايلانىستى دەپۋتات «اق جول» پارتياسىنىڭ اتالعان كونستيتۋتسيالىق رەفورمانى ءتيىستى جانە وزگە دە زاڭدار ارقىلى جۇزەگە اسىرۋدى جالعاستىرۋعا دايىن ەكەنىن مالىمدەدى.
