Konstitusiialyq reforma jönındegı komissiianyŋ kezektı otyrysynda Mäjılıs deputaty, «Aq jol» partiiasy fraksiiasynyŋ jetekşısı Azat Peruaşev bilık tarmaqtary arasyndaǧy ökılettıkter teŋgerımı turaly pıkır bıldırdı.
Deputattyŋ aituynşa, būl mäsele Memleket basşysynyŋ 2025 jylǧy 8 qyrküiektegı Qazaqstan halqyna Joldauyn jüzege asyru aiasynda byltyr qazan aiynda qūrylǧan Parlamenttık reforma jönındegı jūmys tobynyŋ arnaiy otyrysynda jan-jaqty talqylanǧan.
«Sol kezde-aq bız Prezident pen Qūryltai ökılettıkterın naqty ajyratu täsılderın talqylap, ortaq ūstanym qalyptastyrdyq. Osy tūrǧydan alǧanda, daiyndalǧan jaŋa Konstitusiia jobasynda būl ökılettıkter jetkılıktı därejede teŋgerımdı bölıngen dep esepteimın», – dedı Azat Peruaşev.
Onyŋ sözınşe, Prezident Respublikadaǧy eŋ joǧary lauazymdy tūlǧa retınde bilıktıŋ barlyq tarmaǧy – zaŋ şyǧaruşy (Qūryltai), atqaruşy (Ükımet) jäne sot bilıgınıŋ üilesımdı jūmys ısteuın qamtamasyz etedı.
«Sondyqtan Prezident pen Qūryltai arasyndaǧy özara qatynasty “saiasi monopoliiany saqtau nemese küşeitu” dep baǧalau – konstitusiialyq reformanyŋ mänın būrmalau. Prezident pen Qūryltaidyŋ özara qatynasy – ärtürlı bilık tarmaqtarynyŋ emes, tūtas bilıktıŋ halyq aldyndaǧy jauapkerşılıgı instituty men sol bilık tarmaǧynyŋ bırınıŋ arasyndaǧy qatynas», – dedı deputat.
Ol äzırlengen Ata zaŋ jobasy bilıktıŋ bır tarmaǧyn ekınşısınen joǧary qoiudy közdemeitının atap öttı. Jaŋa Konstitusiiada ökılettıkter neǧūrlym teŋ ärı üilesımdı türde bölıngen jüie qalyptastyrylady.
«Būl jaŋa saiasi jüie arqyly jüzege asady. Qoǧam müddesın bıldıru funksiialary Halyq Keŋesın qūru arqyly keŋeitıledı, al Qūryltai käsıbi zaŋ şyǧaru qyzmetıne tolyqtai şoǧyrlanyp, barlyq zaŋnamalyq ökılettıkke ie bolady», – dep atap öttı Azat Peruaşev.
Sondai-aq, ol ūsynylǧan şeşımder Prezidenttıŋ ökılettıgın keŋeitpeitınıne toqtaldy. Kerısınşe, qazırgı zaman talaptary men elımızdıŋ ūlttyq müddelerın ılgerıletu qajettılıgın eskere otyryp, būryn bolǧan qūqyqtyq olqylyqtardy toltyrady.
«Būl reforma öz ideologiiasy jaǧynan 2022 jylǧy konstitusiialyq reformanyŋ logikalyq jalǧasy jäne ony jaŋa sapalyq deŋgeide damytu bolyp tabylady. Sol kezde-aq Prezidenttıŋ Parlamentke yqpalyn şekteitın normalar engızıldı. Atap aitqanda, Prezidenttıŋ partiia müşesı boluyna tyiym salyndy. Būl Qūryltaidyŋ partiialyq tızım boiynşa sailanuy jaǧdaiynda zaŋ şyǧaruşy organnyŋ täuelsızdıgın küşeitedı», – dedı spiker.
Azat Peruaşevtıŋ pıkırınşe, Parlamentke bırqatar joǧary lauazymdy tūlǧalardy taǧaiyndauǧa kelısım beru ökılettıgınıŋ berıluı, sondai-aq azamattardyŋ konstitusiialyq qūqyqtaryn qorǧau kepıldıkterınıŋ küşeiuı «Küştı Prezident – yqpaldy Parlament – esep beretın Ükımet» formulasy aiasynda ökılettıkter teŋgerımınıŋ nyǧaiǧanyn aiqyn körsetedı.
Osyǧan bailanysty deputat «Aq jol» partiiasynyŋ atalǧan konstitusiialyq reformany tiıstı jäne özge de zaŋdar arqyly jüzege asyrudy jalǧastyruǧa daiyn ekenın mälımdedı.
