قازاقستاندا اۆتوموبيلگە ارنالعان ەرەكشە مەملەكەتتىك نومىرلەرگە سۇرانىس ءوسىپ كەلەدى، دەپ حابارلايدى "ادىرنا" ۇلتتىق پورتالى kolesa-عا سىلتەپ.
بۇل قىزمەت 2026 جىلدىڭ قاڭتارىندا جاڭا سالىق كودەكسى كۇشىنە ەنگەننەن كەيىن ىسكە قوسىلعان. العاشقى كۇندەردەن باستاپ جۇرگىزۋشىلەر ارنايى حقكو-لارعا جاپپاي ءوتىنىم بەرە باستاعان.
قر ءىىم «اقپاراتتىق-وندىرىستىك ورتالىعىنىڭ» مالىمەتىنشە، 20 قاڭتارعا دەيىن ەرەكشە نومىرلەرگە 66 339 ءوتىنىم تۇسكەن. ونىڭ ىشىندە 62 852 ءنومىر دايىندالعان، ال 3 487 ءوتىنىم كەرى قايتارىلعان. وتىنىمدەردىڭ قايتارىلۋىنا ءوتىنىش بەرۋشىنىڭ ءوزى باس تارتۋى نەمەسە باج سالىعىنىڭ تولەنبەۋى سەبەپ بولعان.
ءوتىنىم سانى بويىنشا كوشباسشى ءوڭىر — الماتى قالاسى. مۇندا 15 265 ءوتىنىم تىركەلگەن. ودان كەيىن شىمكەنت (7555), استانا (7162), ماڭعىستاۋ وبلىسى (4777) جانە جامبىل وبلىسى (4083) ورنالاسقان. ال ەڭ تومەن كورسەتكىش ۇلىتاۋ وبلىسىندا تىركەلگەن — 553 ءوتىنىم.
ساراپشىلار وڭىرلەردىڭ قىزىعۋشىلىعىن كولىك سانىنا شاققانداعى ۇلەسپەن باعالادى. بۇل كورسەتكىش بويىنشا ماڭعىستاۋ وبلىسى العا شىقتى. بۇل وڭىردەگى 153 627 كولىكتىڭ 4777-سىنە ەرەكشە نومىرگە ءوتىنىم بەرىلگەن، بۇل شامامەن 3,11 پايىزدى قۇرايدى. ودان كەيىن شىمكەنت (2,67%) جانە الماتى قالاسى (2,46%) تۇر. ال استانادا بۇل كورسەتكىش 1,8 پايىزدى، جامبىل وبلىسىندا 1,53 پايىزدى قۇرادى.
وسىلايشا، ەرەكشە مەملەكەتتىك نومىرگە قىزىعۋشىلىق ەڭ جوعارى ءوڭىر رەتىندە ماڭعىستاۋ وبلىسى انىقتالدى. ال ەلوردا تۇرعىندارى سالىستىرمالى تۇردە مۇنداي نومىرلەرگە سيرەك تاپسىرىس بەرەتىنى بايقالدى.
