قازاقستاندا جازاسىن وتەپ جاتقان ەڭ ەگدە ادام بوستاندىققا شىعۋعا دايىندالىپ جاتىر. بۇل تۋرالى ىشكى ىستەر مينيسترلىگىنە قاراستى قىلمىستىق-اتقارۋ جۇيەسى كوميتەتى تengrinews.kz-كە بەرگەن جاۋابىندا ايتتى، دەپ حابارلايدى «ادىرنا» ءتىلشىسى.
«1942 جىلى تۋعان ەر ادامنىڭ جازا مەرزىمى 2027 جىلى اياقتالادى. تۇرمەدەن شىققان كەزدە ول 85 جاسقا تولادى»،-دەلىنگەن حابارلامالا.
قازىرگى تاڭدا قازاقستاننىڭ قىلمىستىق-اتقارۋ جۇيەسى مەكەمەلەرىندە 70 جاستان اسقان شامامەن 100-گە جۋىق سوتتالعان ادام بار.
كوميتەت مالىمەتىنشە، بۇل ازاماتتار جازاسىن جالپى نەگىزدە وتەيدى. قاجەت بولعان جاعدايدا ولارعا مەملەكەت كەپىلدىك بەرگەن تەگىن مەديتسينالىق كومەكتىڭ كولەمى اياسىندا مەديتسينالىق قىزمەت كورسەتىلەدى.
بۇعان دەيىن جەلىدە اقمولا وبلىسىندا تۇراتىن 89 جاستاعى ايەلدىڭ سوتتالىپ، وعان تۇزەتۋ جۇمىستارى تاعايىندالعانى تۋرالى اقپارات تاراعان ەدى. الايدا سوتتىڭ ءباسپاسوز قىزمەتى بۇل مالىمەتتى جوققا شىعاردى. ولاردىڭ ايتۋىنشا، قارت ايەل مەن ونىڭ 72 جاستاعى جيەنى قاساقانا جەڭىل دەنە جاراقاتىن سالعانى ءۇشىن سوتتالعان: زەينەتكەرلەر پودەزدە تۋىسىن سوققىعا جىققان. ەكەۋىنە دە 7 ايعا باس بوستاندىعىن شەكتەۋ جازاسى بەرىلىپ، مىنەز-قۇلقىنا پروباتسيالىق باقىلاۋ بەلگىلەنگەن.
