الماتى قالاسى مادەنيەت باسقارماسى باسشىسىنىڭ بۇرىنعى ورىنباسارى نايليا مۋليۋكوۆانىڭ جازاسىنىڭ وتەلمەگەن بولىگى باس بوستاندىعىن شەكتەۋ جازاسىنا اۋىستىرىلىپ، مەرزىمىنەن بۇرىن بوساتىلدى، دەپ حابارلايدى "ادىرنا" ۇلتتىق پورتالى.
بۇل اقپاراتتى قىلمىستىق-اتقارۋ جۇيەسى كوميتەتى (قاجك) راستادى.
قاجك مالىمەتىنشە، سوت ۇكىمىمەن باس بوستاندىعىنان ايىرۋ جازاسىن وتەپ جاتقان سوتتالۋشىنىڭ جازاسىنىڭ وتەلمەگەن بولىگى سوت شەشىمى نەگىزىندە باس بوستاندىعىن شەكتەۋگە اۋىستىرىلعان.
بوستاندىققا شىققاننان كەيىن نايليا مۋليۋكوۆا پروباتسيا قىزمەتىنىڭ ەسەبىنە قويىلدى. ەندى ول سوت بەلگىلەگەن بارلىق تالاپتاردى، ونىڭ ىشىندە قازاقستان رەسپۋبليكاسىنىڭ اۋماعىنان شىعۋعا قويىلعان شەكتەۋدى ساقتاۋعا مىندەتتى. سونداي-اق پروباتسيا قىزمەتى وعان جۇكتەلگەن مىندەتتەردىڭ ورىندالۋىن تۇراقتى باقىلاۋدا ۇستايدى.
ەسكە سالساق، نايليا مۋليۋكوۆا 2017 جىلى الماتى قالاسى مادەنيەت باسقارماسى باسشىسىنىڭ ورىنباسارى قىزمەتىنە تاعايىندالعان. 2023 جىلى وعان قاتىستى سىبايلاس جەمقورلىققا قارسى ءىس-قيمىل اگەنتتىگى تەرگەۋ باستاعان. 2025 جىلعى 5 ماۋسىمدا الماتى قالاسىنىڭ المالى اۋداندىق سوتى ەكس-شەنەۋنىكتى سەنىپ تاپسىرىلعان مۇلىكتى يەمدەنۋ نەمەسە ىسىراپ ەتۋ، كاسىپكەرلىك قىزمەتكە زاڭسىز قاتىسۋ جانە لاۋازىمدىق وكىلەتتىكتەرىن اسىرا پايدالانۋ باپتارى بويىنشا كىنالى دەپ تانىپ، 4 جىل 6 ايعا باس بوستاندىعىنان ايىرعان.
تەرگەۋ دەرەكتەرىنە سايكەس، ول زاڭسىز ارەكەتتەردىڭ سالدارىنان مەملەكەتكە 12 ميلليون تەڭگەدەن استام ماتەريالدىق شىعىن كەلتىرىلگەن.
