قىتايدىڭ حالىق-ازاتتىق ارمياسىنىڭ جوعارى قولباسشىلىعىندا اۋقىمدى تازالاۋ جۇمىستارى جالعاسىپ جاتىر. The New York Times بۇل جاعدايدى ەلدىڭ قازىرگى زامانعى تاريحىنداعى بۇرىن-سوڭدى بولماعان قۇبىلىس ەكەنىن ايتتى، دەپ حابارلايدى «ادىرنا» ءتىلشىسى.
2023 جىلدىڭ باسىنان بەرى جوعارى لاۋازىمدى 30 گەنەرال مەن ادميرالدىڭ ىشىندە تەك جەتەۋى عانا ءوز قىزمەتىندە قالعان. قالعاندارى قىزمەتتەن بوساتىلعان نەمەسە قوعامدىق كەڭىستىكتەن مۇلدەم جوعالىپ كەتكەن بۇل تۋرالى گازەت قىتايدىڭ مەملەكەتتىك باق حابارلامالارى مەن رەسمي مالىمدەمەلەرگە سۇيەنە وتىرىپ جازدى.
سوڭعى وقيعالاردىڭ ءبىرى رەتىندە قىتايدىڭ ورتالىق اسكەري كەڭەسىندەگى سي ءتسزينپيننىڭ ءبىرىنشى ورىنباسارى چجان يۋسيا مەن بىرىككەن شتاب باستىعى گەنەرال ليۋ چجەنليگە قاتىستى ءىس قوزعالعانىن ايتۋعا بولادى. ولار رەسمي تۇردە ء«تارتىپ پەن زاڭدى ورەسكەل بۇزدى» دەگەن كۇدىككە ءىلىندى.
ادەتتە جەتى مۇشەدەن تۇراتىن ورتالىق اسكەري كەڭەستىڭ قۇرامى قازىرگى ۋاقىتتا ءىس جۇزىندە ەكى ادامعا — سي تسزينپين مەن گەنەرال چجان شەنمينگە دەيىن قىسقارعان. قالعان مۇشەلەر سىبايلاس جەمقورلىققا قارسى ناۋقان اياسىندا قىزمەتتەن الىنعان. چجان شەنمين اسكەري انتيكوررۋپتسيالىق باقىلاۋ ورگاندارىندا ۇزاق جىل جۇمىس ىستەپ، 2025 جىلى كەڭەس توراعاسىنىڭ ورىنباسارى بولىپ تاعايىندالعان. ول اسكەردەگى ساياسي ءتارتىپ پەن ادالدىقتى باقىلاۋعا جاۋاپ بەرەدى.
قىزمەتتەن بوساتۋلار اسكەردىڭ بارلىق تۇرلەرىن قامتىعان، ونىڭ ىشىندە زىمىران كۇشتەرى مەن اسكەري-تەڭىز فلوتى دا بار. چجان يۋسيا مەن ليۋ چجەنليدىڭ كەتۋى اسكەري كەڭەستى سوعىس دايىندىعىنا جاۋاپتى نەگىزگى قولباسشىلارسىز قالدىردى. ەندى ءىرى وپەراتسيالاردى جوسپارلاۋمەن تومەنگى دارەجەلى وفيتسەرلەر اينالىسىپ جاتىر. باسىلىم مۇنىڭ سي ءتسزينپيننىڭ قىتاي قارۋلى كۇشتەرىنىڭ جاۋىنگەرلىك قابىلەتىنە دەگەن سەنىمىن السىرەتىپ، اسكەري باسشىلىقتا ۆاكۋم قالىپتاستىراتىنىن اتاپ ءوتتى.
سونىمەن بىرگە The Wall Street Journal جاپپاي وتستاۆكالار سي تسزينپينگە ارمياعا تولىق باقىلاۋ ورناتۋعا مۇمكىندىك بەرىپ، تايۆانعا ىقتيمال باسىپ كىرۋگە دايىندىقتى جەدەلدەتۋى مۇمكىن ەكەنىن جازدى. كەيبىر دەرەكتەر بويىنشا، سي مەن چجان يۋسيا اراسىندا مۇنداي وپەراتسيانىڭ مەرزىمىنە قاتىستى كەلىسپەۋشىلىكتەر بولعان. قىتاي باسشىسى 2027 جىلعا دەيىن تولىق دايىن بولۋدى تالاپ ەتسە، گەنەرال 2035 جىلدى اتاعان.
قازىرگى جانە بۇرىنعى امەريكالىق شەنەۋنىكتەردىڭ ايتۋىنشا، تازالاۋدىڭ ناقتى سەبەپتەرى ءالى بەلگىسىز. The Wall Street Journal دەرەگىنشە، چجان يۋسيا اقش-قا قىتايدىڭ يادرولىق باعدارلاماسىنا قاتىستى ماڭىزدى تەحنيكالىق مالىمەتتەردى تاراتىپ جىبەردى جانە كادرلىق تاعايىنداۋلار كەزىندە پارا الدى دەگەن ايىپتارعا ۇشىراعان. سونىمەن قاتار ونى «ساياسي توپتار قۇرۋعا»، ياعني ىقپال جەلىلەرىن قالىپتاستىرۋعا كۇدىكتەندىرەدى. پەكين مۇنى پارتيا بىرلىگىنە قاۋىپ رەتىندە قاراستىرادى.
