2025 جىلى وزبەكستان حالقى 693,5 مىڭ ادامعا نەمەسە 1,8%-عا ءوستى، ال 2026 جىلدىڭ 1 قاڭتارىنا قاراي 38 236,7 مىڭ ادامعا جەتتى، دەپ حابارلايدى “ادىرنا” ەلدىڭ ستاتيستيكا اگەنتتىگىنە سىلتەپ.
وزبەكستان حالقىنىڭ ءوسۋ قارقىنى ءۇشىنشى جىل قاتارىنان تومەندەپ كەلەدى – وتكەن جىلى 2%، 2024 جىلى 2,2% بولعان. بۇل ءۇردىس قازاقستاندا دا بايقالادى.
دەگەنمەن، وزبەكستان ورتالىق ازياداعى ەڭ تىعىز حالقى بار ەل بولىپ قالا بەرەدى جانە حالىقتىڭ ءوسۋ قارقىنى جوعارى دەڭگەيدە ساقتالۋدا.
ەلدە قالا حالقىنىڭ سانى دا ارتىپ كەلەدى، ونىڭ ۇلەسى 50,9%-عا جەتتى، ال اۋىل حالقىنىڭ ۇلەسى 49,1%-عا تومەندەدى.
وتكەن جىلى وزبەكستانعا تۇراقتى تۇرۋعا 1,2 مىڭ ادام كەلىپ، 10,1 مىڭ ادام ەلدەن كەتكەن.
تاشكەنت قالاسىنىڭ تۇرعىن سانى 2026 جىلدىڭ 1 قاڭتارىنا قاراي 3 178,1 مىڭ ادامعا جەتتى – وزبەكستان استاناسى ورتالىق ازياداعى ەڭ ءىرى قالا بولىپ قالۋدا.
ال 2026 جىلعى 1 قاڭتارداعى جاعداي بويىنشا قازاقستان حالقىنىڭ سانىن 20 495 975 ادامعا جەتتى.
ءبىر جىل ىشىندە قازاقستاندىقتاردىڭ سانى 212 576 ادامعا ارتقان.
رەسمي دەرەكتەرگە سايكەس، حالىق سانى ەڭ كوپ وڭىرلەردىڭ قاتارىندا تۇركىستان وبلىسى مەن الماتى قالاسى تۇر. تۇركىستان وبلىسىندا حالىق سانى 2 148 658 ادامعا جەتىپ، 2 ميلليوندىق مەجەدەن استى. ال الماتىدا 2 347 924 ادام تۇرادى.
سونداي-اق حالقى 1 ميلليوننان اساتىن وڭىرلەر مەن قالالار قاتارىندا استانا، الماتى وبلىسى، جامبىل وبلىسى، شىمكەنت قالاسى جانە قاراعاندى وبلىسى بار. اتاپ ايتقاندا، استانادا 1 638 233 ادام تۇرادى. بۇل وتكەن جىلمەن سالىستىرعاندا 109 530 ادامعا كوپ. ال الماتى وبلىسىندا 1 596 331 ادام تىركەلگەن. شىمكەنتتە حالىق سانى 1 293 648 ادامعا جەتسە، جامبىل وبلىسىندا 1 215 373 ادام، قاراعاندى وبلىسىندا 1 131 287 ادام تۇرادى.
حالقى ەڭ از وڭىرلەر قاتارىندا ۇلىتاۋ وبلىسى (218 993 ادام), سولتۇستىك قازاقستان وبلىسى (514 156 ادام) جانە اباي وبلىسى (595 676 ادام) اتالدى.
ستاتيستيكاعا سايكەس، ەلدە ۋربانيزاتسيا ءۇردىسى جالعاسىپ جاتىر. قالالاردا 13 029 803 ادام تۇرادى، بۇل وتكەن جىلمەن سالىستىرعاندا 256 688 ادامعا كوپ. ال اۋىل تۇرعىندارىنىڭ سانى 7 466 172 ادامدى قۇراپ، 44 112 ادامعا ازايعان.
ساراپشىلاردىڭ پىكىرىنشە، حالىق سانىنىڭ وسۋىنە تابيعي ءوسىم مەن ىشكى كوشى-قون اسەر ەتۋدە.
