اقابا پروتسەسى سامميتىنە قاتىسۋ ءۇشىن يوردانيا، تاجىكستان، وزبەكستان جانە تۇركىمەنستان باسشىلارى قازاقستان استاناسىنا كەلدى، دەپ حابارلايدى "ادىرنا".
شەتەلدىك دەلەگاتسيالاردى اۋەجايدان مەملەكەت باسشىسى قاسىم-جومارت توقاەۆ قارسى الدى.
5 قاراشادا يوردان حاشيميت كورولدىگىنىڭ كورولى II ابداللا بەن ءال-حۋسەين قازاقستانعا رەسمي ساپارمەن كەلدى. اۋەجايدا مارتەبەلى مەيماندى سالتاناتتى قارسى الۋ ءراسىمى ءوتىپ، قۇرمەت قاراۋىلى ساپ تۇزەدى.
سونداي-اق وزبەكستان پرەزيدەنتى شاۆكات ميرزيوەۆ، تاجىكستان پرەزيدەنتى ەمومالي راحمون جانە تۇركىمەنستان پرەزيدەنتى سەردار بەردىمۇحامەدوۆ استاناعا جۇمىس ساپارىمەن كەلدى.
قاسىم-جومارت توقاەۆ پەن II ابداللا بەن ءال-حۋسەيننىڭ كەزدەسۋىندە ەكىجاقتى قارىم-قاتىناستاردى نىعايتۋ ماسەلەلەرى تالقىلاندى. پرەزيدەنت يوردانيا كورولىنىڭ قازاقستان مەن يوردانيا اراسىنداعى دوستىق بايلانىستاردى دامىتۋعا قوسقان ۇلەسىن اتاپ ءوتىپ، ونى Al-Farabi وردەنىمەن ماراپاتتادى.
ءوز كەزەگىندە يوردانيا كورولى قاسىم-جومارت توقاەۆقا يوردان حاشيميت كورولدىگىنىڭ جوعارى مەملەكەتتىك ناگراداسى – al-Hussain ibn Ali وردەنىن تابىستادى.
تاجىكستان پرەزيدەنتى ەمومالي راحموننىڭ قازاقستانعا رەسمي ساپارى اياسىندا ەكى ەل كوشباسشىلارى ستراتەگيالىق ارىپتەستىك پەن وداقتاستىق قاتىناستاردى نىعايتۋ ماسەلەلەرىن تالقىلايدى.
سامميت اياسىندا جاڭا تەحنولوگيالاردان تۋىندايتىن قاۋىپ-قاتەرلەرگە قارسى كۇرەس ماسەلەلەرى دە قاراستىرىلادى. جيىنعا الەمنىڭ ءتۇرلى ەلدەرىنىڭ باسشىلارى، قاۋىپسىزدىك ۆەدومستۆولارى مەن بۇۇ جانە ينتەرپول سياقتى حالىقارالىق ۇيىمداردىڭ وكىلدەرى قاتىسادى.
