2025 jyly Özbekstan halqy 693,5 myŋ adamǧa nemese 1,8%-ǧa östı, al 2026 jyldyŋ 1 qaŋtaryna qarai 38 236,7 myŋ adamǧa jettı, dep habarlaidy “Adyrna” eldıŋ statistika agenttıgıne sıltep.
Özbekstan halqynyŋ ösu qarqyny üşınşı jyl qatarynan tömendep keledı – ötken jyly 2%, 2024 jyly 2,2% bolǧan. Būl ürdıs Qazaqstanda da baiqalady.
Degenmen, Özbekstan Ortalyq Aziiadaǧy eŋ tyǧyz halqy bar el bolyp qala beredı jäne halyqtyŋ ösu qarqyny joǧary deŋgeide saqtaluda.
Elde qala halqynyŋ sany da artyp keledı, onyŋ ülesı 50,9%-ǧa jettı, al auyl halqynyŋ ülesı 49,1%-ǧa tömendedı.
Ötken jyly Özbekstanǧa tūraqty tūruǧa 1,2 myŋ adam kelıp, 10,1 myŋ adam elden ketken.
Taşkent qalasynyŋ tūrǧyn sany 2026 jyldyŋ 1 qaŋtaryna qarai 3 178,1 myŋ adamǧa jettı – Özbekstan astanasy Ortalyq Aziiadaǧy eŋ ırı qala bolyp qaluda.
Al 2026 jylǧy 1 qaŋtardaǧy jaǧdai boiynşa Qazaqstan halqynyŋ sanyn 20 495 975 adamǧa jettı.
Bır jyl ışınde qazaqstandyqtardyŋ sany 212 576 adamǧa artqan.
Resmi derekterge säikes, halyq sany eŋ köp öŋırlerdıŋ qatarynda Türkıstan oblysy men Almaty qalasy tūr. Türkıstan oblysynda halyq sany 2 148 658 adamǧa jetıp, 2 milliondyq mejeden asty. Al Almatyda 2 347 924 adam tūrady.
Sondai-aq halqy 1 millionnan asatyn öŋırler men qalalar qatarynda Astana, Almaty oblysy, Jambyl oblysy, Şymkent qalasy jäne Qaraǧandy oblysy bar. Atap aitqanda, Astanada 1 638 233 adam tūrady. Būl ötken jylmen salystyrǧanda 109 530 adamǧa köp. Al Almaty oblysynda 1 596 331 adam tırkelgen. Şymkentte halyq sany 1 293 648 adamǧa jetse, Jambyl oblysynda 1 215 373 adam, Qaraǧandy oblysynda 1 131 287 adam tūrady.
Halqy eŋ az öŋırler qatarynda Ūlytau oblysy (218 993 adam), Soltüstık Qazaqstan oblysy (514 156 adam) jäne Abai oblysy (595 676 adam) ataldy.
Statistikaǧa säikes, elde urbanizasiia ürdısı jalǧasyp jatyr. Qalalarda 13 029 803 adam tūrady, būl ötken jylmen salystyrǧanda 256 688 adamǧa köp. Al auyl tūrǧyndarynyŋ sany 7 466 172 adamdy qūrap, 44 112 adamǧa azaiǧan.
Sarapşylardyŋ pıkırınşe, halyq sanynyŋ ösuıne tabiǧi ösım men ışkı köşı-qon äser etude.
