قازاقستاننىڭ بىرىڭعاي ۋاقىت بەلدەۋىنە كوشۋى ەلدىڭ ەنەرگەتيكالىق ماسەلەلەرىن شەشكەن جوق، كەرىسىنشە، كەشكى ۋاقىتتاعى ەلەكتر جۇيەسىنە تۇسەتىن جۇكتەمەنىڭ شارىقتاۋ شەگىن ارتتىردى. بۇل تۋرالى بۇرىنعى ەنەرگەتيكا ۆيتسە-ءمينيسترى باقىتجان جاقساليەۆ جۋرناليست سامال يبراەۆاعا بەرگەن سۇحباتىندا مالىمدەدى، دەپ حابارلايدى «ادىرنا» ءتىلشىسى.
ايتۋىنشا، ۋاقىتتى اۋىستىرۋ تۋرالى شەشىم ەنەرگەتيكالىق جۇيەنىڭ جۇمىسى ەسكەرىلمەي وتىرىپ قابىلدانعان.
«قازاقستان گەوگرافيالىق تۇرعىدان ءۇش ۋاقىت بەلدەۋىندە ورنالاسقان: شىعىس، ورتالىق جانە باتىس. كەڭەس داۋىرىندە سولاي ءومىر سۇردىك. ءار بەلدەۋدە كەشكى جۇكتەمەنىڭ ءوز شىڭى بولاتىن. بىرىڭعاي ۋاقىت بەلدەۋىنە كوشكەننەن كەيىن بۇل شارىقتاۋ كەزەڭدەرى ءبىر ۋاقىتتا سايكەس كەلىپ، ەلەكتر جەلىلەرىنە قوسىمشا سالماق ءتۇسىردى»، — دەپ ءتۇسىندىردى جاقساليەۆ.
سونداي-اق ول ماسەلە ەلەكتر ەنەرگياسىنىڭ جەتىسپەۋشىلىگىندە ەمەس، جۇكتەمەنى دۇرىس باسقارۋدا ەكەنىن اتاپ ءوتتى.
«ەگەر قۋات تاپشىلىعى بولماسا، ەلەكتر ەنەرگياسىنىڭ تاپشىلىعى دا بولماۋى كەرەك. قازىرگى پروبلەما — جەلىلىك تاپشىلىق پەن ديسپەتچەرلىك باسقارۋدا. جەلىلەر بوس كەزدە تاريف تومەن بولۋى ءتيىس. ال شارىقتاۋ ساعاتتارىندا جوعارى بولۋى كەرەك. بۇل — قالىپتى ەكونوميكالىق مەحانيزم. بىراق بىزدە جارتىلاي عانا شەشىم قابىلداندى»،- دەيدى جاقساليەۆ.
ماماننىڭ ايتۋىنشا، ەنەرگەتيكالىق كومپانيالار وزىندىك قۇنىنان تومەن دەڭگەيدە جۇمىس ىستەۋگە ءماجبۇر بولدى. ال نارىقتا ەلەكتر ەنەرگياسىن وندىرمەي، ونى تەك شارىقتاۋ ساعاتتارىندا قىمبات باعاعا قايتا ساتاتىن قۇرىلىمدار پايدا بولعان.
«بىرىڭعاي ۋاقىت بەلدەۋى ماسەلەنى شەشكەن جوق، كەرىسىنشە ونى ۋشىقتىردى»،— دەپ قورىتىندىلادى ول.
