قىرعىز رەسپۋبليكاسىنىڭ ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) بىشكەك قالاسى بويىنشا بۇرىنعى باسشىسى ەلدار جاقىپبەكوۆ ۇستالىپ، ۋاقىتشا ۇستاۋ يزولياتورىنا قامالدى. بۇل تۋرالى 24.kg باسىلىمى جازدى، دەپ حابارلايدى "ادىرنا".
الدىن الا مالىمەتتەرگە سايكەس، وعان قاتىستى قىلمىستىق ءىس قوزعالعان. تەرگەۋدى اسكەري پروكۋراتۋرا جۇرگىزىپ جاتىر. قۇقىق قورعاۋ ورگاندارىنداعى دەرەككوزدەردىڭ ايتۋىنشا، جاقىپبەكوۆ ءبىر تاۋلىك ىشىندە ۇستالعان. الايدا ءىس قاي باپ بويىنشا تىركەلگەنى جانە ونىڭ پروتسەستىك مارتەبەسى جونىندە رەسمي اقپارات جاريالانعان جوق.
الەۋمەتتىك جەلىلەردە جاقىپبەكوۆ ۇستالعاننان كەيىن تۇسىرىلگەنى ايتىلعان فوتو دا تارادى.
14 اقپاندا ەلوردالىق ۇقمك باسقارماسىندا كادرلىق وزگەرىس بولىپ، جاڭا باسشى بولىپ ۇلان بيبوسىنوۆ تاعايىندالعانى بەلگىلى بولدى.
ايتا كەتەيىك، جاقىپبەكوۆتىڭ ۇستالعانى تۋرالى اقپارات العاش رەت 10 اقپاندا تاراعان. ول كەزدە قۇزىرلى ورگان بۇل مالىمەتتى رەسمي تۇردە جوققا شىعارعان ەدى.
سونداي-اق 10 اقپاندا قىرعىزستان پرەزيدەنتى سادىر جاپاروۆ ءوزىنىڭ سەرىكتەسى قامشىبەك تاشيەۆتى بارلىق قىزمەتىنەن بوساتقان بولاتىن.
