ۇلتتىق قاۋىپسىزدىك كوميتەتى ستەنداپ-ازىلكەش نۇرلان سابۋروۆقا قاتىستى تەكسەرىس جۇرگىزىپ جاتىر. بۇل تۋرالى كوميتەتتىڭ ءباسپاسوز قىزمەتى مالىمدەدى، دەپ حابارلايدى "ادىرنا".
ۇلتتىق قاۋىپسىزدىك كوميتەتىنىڭ ءباسپاسوز قىزمەتى "نۇرلان سابۋروۆ جەكە اسكەري كومپانيانىڭ ء(جار) رەسەيلىك جالدامالىلارىنا دەمەۋشىلىك ەتۋگە قاتىستى" دەگەن جەلىدەگى اقپاراتقا تۇسىنىكتەمە بەردى.
"ۇلتتىق قاۋىپسىزدىك كوميتەتى ءسىزدىڭ ءوتىنىشىڭىزدى قاراپ شىقتى. اقپارات تىركەلدى جانە تەكسەرىس جۇرگىزىلۋدە", - دەپ اتاپ ءوتتى ۆەدومستۆونىڭ ءباسپاسوز قىزمەتى وكىلدەرى.
سوڭعى كۇندەرى جەلىدە سابۋروۆتىڭ رەسەيلىك اسكەري قىزمەتكەرلەرگە ماتەريالدىق كومەك كورسەتتى دەگەن بەينەماتەريالدار تاراعان. بۇعان دەيىن تانىمال قازاقستاندىق كوميككە رەسەيگە 50 جىلعا كىرۋگە تىيىم سالىنعانى بەلگىلى بولدى. شەشىم «ۇلتتىق قاۋىپسىزدىك مۇددەسى، زاڭنامانى ساقتاۋ جانە ءداستۇرلى رۋحاني-ادامگەرشىلىك قۇندىلىقتاردى قورعاۋ» نەگىزىندە قابىلدانعانى ايتىلعان.
ازىلكەش ۆنۋكوۆو اۋەجايىندا، دۋبايدان ورالعاننان كەيىن توقتاتىلعان. ول تەگىن دەپورتاتسيادان باس تارتىپ، قازاقستانعا بيلەت ساتىپ العان. 7 اقپان كۇنى تاڭەرتەڭ الماتىعا كەلگەن. ونىڭ ارتىنان «چتو بىلو دالشە» شوۋىنىڭ تاعى ءبىر جۇرگىزۋشىسى الەكسەي ششەرباكوۆ تا ۇشىپ كەلگەن.
زاڭگەر الەكساندر حامينسكيدىڭ ايتۋىنشا، سابۋروۆ رەسەيگە كىرۋگە سالىنعان تىيىمدى رەسەيلىك ساياساتقا قاتىستى ۇستانىمىن جاريا تۇردە وزگەرتكەن جاعدايدا الىپ تاستاي الادى. ول تىيىمنىڭ سەبەبى رەتىندە سوعىسقا قاتىستى سىن، «انتيرەسەيلىك مالىمدەمەلەر» جانە كوشى-قون مەن سالىق زاڭناماسىن جۇيەلى بۇزۋ اتالعانىن جەتكىزگەن.
8 اقپاندا نۇرلان سابۋروۆ رەسەيگە كىرۋگە تىيىم سالىنۋىنا العاش رەت پىكىر ءبىلدىرىپ، جاعدايدى جاريا تالقىلامايتىنىن، بۇل ىسپەن زاڭگەرلەر اينالىساتىنىن مالىمدەدى. سونداي-اق ول شىعارماشىلىق جولىن ەكاتەرينبۋرگتە باستاپ، كەيىن ماسكەۋدە جالعاستىرعانىن ايتىپ، رەسەيگە كورەرمەن قولداۋى ءۇشىن العىس ءبىلدىردى جانە جۋرناليستەر مەن بلوگەرلەردى وتباسىنىڭ جەكە ومىرىنە ارالاسپاۋعا شاقىرعان.
جاعدايعا قاتىستى قازاقستاننىڭ سىرتقى ىستەر مينيسترلىگى دە تۇسىنىكتەمە بەردى. ءمينيستردىڭ ورىنباسارى الىبەك باقاەۆتىڭ سوزىنشە، سابۋروۆ - قازاقستان ازاماتى، ال رەسەي قابىلداعان شەشىم سول ەلدىڭ ىشكى زاڭناماسىمەن رەتتەلەدى. مۇنداي تىيىمدار سيرەك قۇبىلىس ەمەس جانە قاجەت بولعان جاعدايدا ازاماتتار ادۆوكات جالداپ، شەشىمدى سوت تارتىبىمەن داۋلاسا الادى.
سونداي-اق سابۋروۆتىڭ رەسەيدەگى مۇلكىنە قاتىستى ماسەلەلەر دە سول ەلدىڭ زاڭناماسىنا سايكەس، سوتتار مەن ۋاكىلەتتى ورگاندار ارقىلى شەشىلەتىنى اتاپ ءوتىلدى.
