پەتروپاۆل قالالىق سوتى ءوزىن الەۋمەتتىك جەلىلەردە ۇلتتىق قاۋىپسىزدىك كوميتەتىنىڭ (ۇقك) مايورى رەتىندە تانىستىرعان ادامدى سوتتادى، دەپ حابارلايدى “ادىرنا” ۇلتتىق پورتالى.
ازاماتتاردى الداعان 31 جاستاعى دامير امانگەلديەۆكە قاتىستى ۇكىم شىعاردى.
سوت مالىمەتىنشە، سوتتالۋشى ءارتۇرلى ادامدارعا ءوزىن قىلمىستىق-اتقارۋ جۇيەسى قىزمەتكەرى، ەسىرتكى قىلمىسىنا قارسى كۇرەس ءبولىمىنىڭ قىزمەتكەرى نەمەسە ۇقك مايورى رەتىندە تانىستىرىپ، ءتۇرلى ماسەلەلەردى اقشاعا شەشىپ بەرە الاتىنىن ايتىپ سەندىرگەن. الايدا ونىڭ اتالعان قۇقىق قورعاۋ ورگاندارىنىڭ ەشقايسىسىندا قىزمەت اتقارماعانى انىقتالعان.
ءىس ماتەريالدارىنا سايكەس، ول پەتروپاۆل تۇرعىنىنا جۇرگىزۋشى كۋالىگىن الىپ بەرۋگە ۋادە بەرىپ، 80 مىڭ تەڭگە العان. كەيبىر جابىرلەنۋشىلەردەن العان قاراجات كولەمى 150 مىڭ تەڭگەگە دەيىن جەتكەن.
سونداي-اق سوتتالۋشى TikTok الەۋمەتتىك جەلىسىندە تانىسقان ايەلدى دە الداپ، ءتۇرلى جەكە جاعدايلارىن العا تارتىپ، اقشا مەن التىن اشەكەيلەرىن يەمدەنگەن. كەيىن زەرگەرلىك بۇيىمداردى لومباردقا وتكىزگەن. وسى ەپيزود بويىنشا كەلتىرىلگەن جالپى شىعىن شامامەن 700 مىڭ تەڭگەنى قۇرادى.
سوت ونىڭ بۇل قىلمىستاردى پروباتسيالىق باقىلاۋدا جۇرگەن كەزىندە جاساعانىن اتاپ ءوتتى.
ول قاۋىپسىزدىگى ەڭ جوعارى قىلمىستىق-اتقارۋ جۇيەسى مەكەمەسىندە 4 جىل 8 اي مەرزىمگە باس بوستاندىعىنان ايىرىلدى.
سونىمەن قاتار، سوت ونى جابىرلەنۋشىلەردىڭ بىرىنە شامامەن 620 مىڭ تەڭگە كولەمىندەگى ماتەريالدىق شىعىندى وتەۋگە مىندەتتەدى.
ۇكىم زاڭدى كۇشىنە ەنگەن جوق.
