جەنەۆادا اقش پەن يران اراسىنداعى يادرولىق كەلىسسوزدەردىڭ ەكىنشى راۋندى اياقتالدى. قوس تاراپ ىقتيمال كەلىسىمنىڭ نەگىزگى پارامەترلەرى بويىنشا ورتاق تۇسىنىككە كەلگەن. بۇل تۋرالى يران سىرتقى ىستەر مينيسترلىگى ايتتى، دەپ حابارلايدى «ادىرنا» ءتىلشىسى.
«يران يسلام رەسپۋبليكاسى مەن امەريكا قۇراما شتاتتارى اراسىنداعى جاناما كەلىسسوزدەر ورتاق ماقساتتار مەن ءتيىستى تەحنيكالىق ماسەلەلەردى ايقىنداۋ باعىتىندا جاقسى ناتيجەمەن اياقتالدى»، – دەلىنگەن حابارلامادا.
سونداي-اق ىقتيمال كەلىسىم ءماتىنىن ازىرلەۋدى باستاۋ ءۇشىن نەگىزگى پرينتسيپتىك ماسەلەلەر بويىنشا جالپى كەلىسىمگە قول جەتكىزىلگەنى ايتىلدى.
«بۇل كەلىسىمگە تەز ارادا قول جەتكىزەمىز دەگەن ءسوز ەمەس، بىراق ەڭ بولماعاندا ۇدەرىس باستالدى. ءبىز ونى مۇمكىندىگىنشە تەز اياقتاۋعا ۇمىتتەنەمىز جانە وعان جەتكىلىكتى ۋاقىت بولۋگە دايىنبىز. الايدا ءماتىندى ازىرلەۋ كەزەڭىنە كەلگەندە جۇمىس الدەقايدا ناقتى ءارى كۇردەلى بولا تۇسەدى»، – دەدى يران ءسىم باسشىسى ابباس اراگچي.
ونىڭ ايتۋىنشا، ناقتى مەرزىمدەر بەلگىلەنبەگەن.
«تاراپتار ىقتيمال كەلىسىمنىڭ ماتىندىك جوبالارى بويىنشا جۇمىس ىستەپ، ولارمەن ءوزارا الماسادى، سودان كەيىن ءۇشىنشى راۋندتىڭ كۇنىن انىقتايدى»، – دەلىنگەن مالىمدەمەدە.
تاسس اگەنتتىگىنىڭ حابارلاۋىنشا، اقش اكىمشىلىگى جەنەۆاداعى كەلىسسوزدەردى ناتيجەلى دەپ باعالاپ، تەگەران ەكى اپتا ىشىندە قالعان ماسەلەلەردى شەشۋگە قاتىستى ۇسىنىستارىن ۇسىنادى دەپ كۇتۋدە.
