جەنەۆادا وتكەن اقش پەن يران اراسىندا يادرولىق باعدارلامانى رەتتەۋگە باعىتتالعان جاناما كەلىسسوزدەر بارىسىندا «ازداعان ىلگەرىلەۋگە» قول جەتكىزىلدى. بۇل تۋرالى اق ءۇيدىڭ ءباسپاسوز حاتشىسى كەرولاين لەۆيتت مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، كەيبىر ماسەلە بويىنشا كەلىسپەۋشىلىكتەر ءالى دە ساقتالىپ وتىر.
«اقش پەن يران اراسىنداعى كەلىسسوزدەر بارىسىندا ازداعان ىلگەرىلەۋ بايقالدى. دەگەنمەن، تاراپتاردىڭ ۇستانىمدارى ءالى دە ءبىر-بىرىنەن وتە الشاق. مەنىڭ بىلۋىمشە، يران تاراپى الداعى بىرنەشە اپتا ىشىندە بىزگە كەيبىر ناقتى مالىمەتتەر ۇسىنۋدى جوسپارلاپ وتىر»،-دەدى حاتشى.
لەۆيتت يران ءۇشىن ترامپ جانە ونىڭ اكىمشىلىگىمەن كەلىسىمگە كەلۋ وتە دۇرىس شەشىم بولاتىنىن اتاپ ءوتتى.
17 اقپاندا وماننىڭ اراعايىندىعىمەن وتكەن اقش پەن يران اراسىنداعى كەلىسسوزدەردىڭ ەكىنشى راۋندى اياقتالدى. يران سىرتقى ىستەر ءمينيسترى ابباس اراكچي تەگەران مەن ۆاشينگتون بولاشاق يادرولىق كەلىسىمنىڭ بىرنەشە نەگىزگى تارماقتارى بويىنشا ورتاق كەلىسىمگە كەلگەنىن ايتتى.
دەگەنمەن، Axios باسىلىمىنا سۇقبات بەرگەن امەريكالىق شەنەۋنىكتەر يران مەن اقش اراسىنداعى كەلىسپەۋشىلىكتەردى تولىق شەشۋ مۇمكىندىگىنە كۇمان كەلتىرگەن. باسىلىم دەرەگىنشە، سوڭعى 24 ساعات ىشىندە اقش تاياۋ شىعىسقا 50 F-35, F-22 جانە F-16 جويعىش ۇشاعىن جىبەرگەن.
