بۇۇ قاۋىپسىزدىك كەڭەسىنىڭ ۋكرايناداعى جاعدايعا ارنالعان وتىرىسى قارساڭىندا 51 مەملەكەت رەسەيدىڭ ۋكرايناداعى بەيبىت تۇرعىندار مەن ازاماتتىق ينفراقۇرىلىمعا جاسالعان شابۋىلدارىنا الاڭداۋشىلىق ءبىلدىردى، دەپ حابارلايدى "ادىرنا".
DW مالىمەتىنشە، قارا تەڭىزدەگى ساۋدا كەمەلەرىنىڭ قاۋىپسىزدىگىن قامتاماسىز ەتۋگە شاقىردى.
بىرلەسكەن مالىمدەمە 23 قىركۇيەكتە نيۋ-يوركتە بۇۇ باس اسسامبلەياسىنىڭ جوعارى دەڭگەيدەگى اپتالىعى اياسىندا جاريالاندى. قۇجاتتى ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى كايا كاللاس تانىستىردى. مالىمدەمەگە ەۋروپالىق وداق ەلدەرىمەن قاتار اۆستراليا، كانادا، جاپونيا، وڭتۇستىك كورەيا، جاڭا زەلانديا، نورۆەگيا، ۋكراينا جانە باسقا مەملەكەتتەر قوسىلدى.
قۇجاتتا رەسەيدىڭ ۋكراينا اۋماعىنداعى ازاماتتىق نىساندار مەن ينفراقۇرىلىمعا جاساعان شابۋىلدارىنا الاڭداۋشىلىق بىلدىرىلگەن. مەملەكەتتەر حالىقارالىق گۋمانيتارلىق قۇقىق تالاپتارىن ساقتاۋعا جانە بەيبىت تۇرعىنداردى قورعاۋعا شاقىردى.
سونداي-اق مالىمدەمەدە قارا تەڭىزدەگى شابۋىلدارعا ەرەكشە نازار اۋدارىلعان. قول قويعان مەملەكەتتەر تەڭىزدەگى جاعدايدىڭ ۋكراينانىڭ استىق ەكسپورتىنا اسەر ەتىپ، الەمدىك ازىق-تۇلىك قاۋىپسىزدىگىنە قاۋىپ ءتوندىرۋى مۇمكىن ەكەنىن اتاپ ءوتتى.
وسىعان بايلانىستى تاراپتار قارا تەڭىزدە ەركىن كەمە قاتىناسىن قامتاماسىز ەتۋگە باعىتتالعان كەلىسىمدەر جاساۋ جونىندەگى كۇش-جىگەردى قولدايتىنىن مالىمدەدى. سونىمەن قاتار ساۋدا كەمەلەرى مەن وڭىردەگى ماڭىزدى ينفراقۇرىلىمدى قورعاۋعا شاقىردى.
ەۋروپالىق وداقتىڭ مالىمەتىنشە، ۋكراينا اۋىل شارۋاشىلىعى ونىمدەرىن الەمدىك نارىققا شىعارۋدا ماڭىزدى ءرول اتقارادى. ەلدىڭ استىق ەكسپورتىنىڭ باسىم بولىگى قارا تەڭىز ارقىلى جۇزەگە اسىرىلادى.
