اقش-تىڭ كاليفورنيا شتاتىنداعى سانتا-مونيكا قالاسىندا Waymo كومپانياسىنا تيەسىلى جۇرگىزۋشىسىز اۆتوكولىك مەكتەپ ماڭىندا جولدان ءوتىپ بارا جاتقان بالانى قاعىپ كەتتى. وقيعا بەسىنشى بۋىنداعى، جۇرگىزۋشى-وپەراتورى جوق ۇشقىشسىز ءاۆتوموبيلدىڭ قاتىسۋىمەن بولعان.
كومپانيانىڭ مالىمەتىنشە، كولىك قوزعالىس كەزىندە جىلدامدىعىن 27 كم/ساع-تان 10 كم/ساع-تان تومەن دەڭگەيگە دەيىن ازايتقان. سونىڭ ناتيجەسىندە بالا جەڭىل جاراقات العان. Waymo بۇل وقيعا تۋرالى اقش-تىڭ ۇلتتىق جول قوزعالىسى قاۋىپسىزدىگى باسقارماسىنا (NHTSA) رەسمي تۇردە حابارلاعان.
Waymo ءوز ەسەبىندە ارنايى مودەلدەۋگە سۇيەنە وتىرىپ، ءدال وسىنداي «ەلەس جاياۋ جۇرگىنشى» ستسەناريىندە ءمىنسىز ادام-جۇرگىزۋشى بالانى شامامەن 22,5 كم/ساع جىلدامدىقپەن قاعار ەدى دەپ كورسەتكەن. كومپانيانىڭ پىكىرىنشە، مۇنداي سوققى اناعۇرلىم اۋىر جاراقاتتارعا اكەلۋى مۇمكىن بولعان.
وقيعادان كەيىن ۇلتتىق جول قوزعالىسى قاۋىپسىزدىگى باسقارماسى مەكتەپ وقۋشىلارىن اكەلۋ جانە اكەتۋ ۋاقىتىندا كامەلەتكە تولماعان جاياۋ جۇرگىنشىلەردىڭ قاۋىپسىزدىگىنە قاتىستى Waymo كومپانياسىنىڭ ارەكەتتەرىن تەكسەرۋ ءۇشىن رەسمي تەرگەۋ باستادى. تەرگەۋ جۇوگىزۋشىسىز كولىكتەردىڭ مەكتەپ ماڭىنداعى قوزعالىس ەرەجەلەرىن قانشالىقتى دۇرىس ساقتايتىنىن باعالاۋعا باعىتتالعان.
سونىمەن قاتار Waymo ءوزىنىڭ دامۋ جوسپارلارىن دا جاريالادى. كومپانيا 2026 جىلعا قاراي سەرۆيستىڭ جۇمىس ايماعىن 12 قالاعا دەيىن كەڭەيتۋدى كوزدەپ وتىر. جاقىن ۋاقىتتا سان-فرانتسيسكو حالىقارالىق اۋەجايىندا تاڭدالعان پايدالانۋشىلار ءۇشىن جۇرگىزۋشىسىز ساپارلار ۇسىنىلماق.
بۇدان بولەك، ءبىر جىل ىشىندە Waymo 13 كامەرا، 6 رادار جانە 4 ليدارمەن جابدىقتالعان التىنشى بۋىنداعى ۇشقىشسىز كولىگىن ىسكە قوسۋدى جوسپارلاپ وتىر. ال 2024 جىلدىڭ ءتورتىنشى توقسانىندا كومپانيا لوندون قالاسىندا روبوتاكسي قىزمەتىن ىسكە قوسۋدى كوزدەيدى.
اتالعان وقيعا جۇرگىزۋشىسىز كولىكتەردىڭ قاۋىپسىزدىگى، اسىرەسە بالالار كوپ شوعىرلاناتىن ايماقتارداعى قوزعالىسى ماسەلەسىنە قوعام نازارىن قايتا اۋدارتتى.
