جارىلىستان 6 ادام قازا تاپقان سوڭ. گرۋزيادا 22 قاراشا ۇلتتىق ازا تۇتۋ كۇنى بولىپ جاريالاندى

199
Adyrna.kz Telegram
https://www.adyrna.kz/storage/uploads/mukVsNaW0PmBg3zPdFWronvYn1mt9534xAHDaEm2.webp

فوتو MIAofGeorgia / Facebook.com

گرۋزيا بيلىگى تبيليسي قالاسىنىڭ شەتىندەگى كۆەمو-پونيچالا اۋدانىندا بولعان جويقىن گاز جارىلىسىنا بايلانىستى 22 قاراشانى ۇلتتىق ازا تۇتۋ كۇنى دەپ جاريالادى. قايعىلى وقيعا سالدارىنان تۇرعىن ءۇيدىڭ ءبىر بولىگى قيراپ، التى ادام كوز جۇمعان. بۇل تۋرالى ەل ۇكىمەتىنىڭ اكىمشىلىگى مالىمدەدى، دەپ حابارلايدى “ادىرنا”.

وقيعا 19 قاراشا كۇنى تاڭەرتەڭ بولعان. الدىن الا بولجام بويىنشا، تۇرعىن ۇيدەگى پاتەرلەردىڭ بىرىندە ورنالاسقان جىلىتۋ قۇرىلعىسىنىڭ اقاۋىنان گاز سىرتقا شىعىپ، جينالعان گاز جارىلىسقا سەبەپ بولعان. سوققىنىڭ كۇشتى بولعانى سونشالىق، عيمارات شاتىرىنىڭ ءبىر بولىگى مەن قاباتارالىق جابىندارى وپىرىلىپ تۇسكەن.

سوڭعى مالىمەتتەرگە سايكەس، جارىلىس سالدارىنان التى ادام، ونىڭ ىشىندە ءبىر بالا قازا تاپقان. تاعى بەس تۇرعىن ءتۇرلى جاراقاتپەن اۋرۋحاناعا جەتكىزىلدى. زارداپ شەككەندەردىڭ اراسىندا جارىلىس بولعان پاتەردىڭ يەسى دە بار. دارىگەرلەر ونىڭ جاعدايىن وتە اۋىر دەپ باعالاپ وتىر.

وقيعا ورنىندا ىزدەۋ-قۇتقارۋ جۇمىستارى شامامەن 15 ساعات بويى جۇرگىزىلگەن. عيماراتتىڭ قالعان بولىگىنىڭ دە قۇلاۋ قاۋپىنە بايلانىستى ماماندار ۇيىندىلەردى ارنايى تەحنيكامەن ەمەس، قولمەن ارشۋعا ءماجبۇر بولعان. قۇتقارۋشىلاردىڭ تاباندى جۇمىسىنىڭ ناتيجەسىندە ءۇش جاسار قىز بالا ءۇيىندى استىنان تىرىدەي شىعارىلدى.

 گرۋزيانىڭ بۇقارالىق اقپارات قۇرالدارىنىڭ حابارلاۋىنشا، ءبۇلدىرشىننىڭ قازىرگى جاعدايى قاناعاتتانارلىق.

تبيليسي مەرياسىنىڭ مالىمەتىنشە، عيماراتتاعى التى كىرەبەرىستىڭ ەكەۋى تۇرۋعا قاۋىپتى دەپ تانىلعان. قاۋىپسىزدىك ماقساتىندا اتالعان بولىكتەردە تۇراتىن 28 وتباسى ۋاقىتشا قوناقۇيلەرگە ورنالاستىرىلدى.

اتالعان وقيعا بويىنشا گرۋزيا قىلمىستىق كودەكسىنىڭ 240-بابىنا سايكەس قىلمىستىق ءىس قوزعالدى. بۇل باپ قۇرىلىس، تاۋ-كەن ءوندىرىسى جانە باسقا دا جۇمىستار بارىسىندا قاۋىپسىزدىك تالاپتارىن بۇزعانى ءۇشىن جاۋاپكەرشىلىكتى كوزدەيدى.

پىكىرلەر