رەسەيدىڭ ياسنىي قالاسى ماڭىنداعى رەسەي قارۋلى كۇشتەرىنىڭ ستراتەگيالىق ماقساتتاعى زىمىران اسكەرلەرى بازاسىندا زىمىران ۇشىرۋ ءساتسىز اياقتالدى، دەپ حابارلايدى «ادىرنا» ءتىلشىسى DW-نە سىلتەمە جاساپ.
باق مالىمەتىنشە، زىمىران جەرگە قۇلاپ، جارىلىپ كەتكەن. وقيعا 28 قاراشادا بولعان. جارىلىس تۋرالى دەرەكتەردى وقيعا كۋاگەرلەرى راستاپ وتىر.
قالا تۇرعىندارى الەۋمەتتىك جەلىلەردە اسكەري نىسان ورنالاسقان ايماقتان اسپانعا كوتەرىلگەن قالىڭ ءتۇتىننىڭ سۋرەتتەرىن جاريالادى. ولار جاعىمسىز ءيىس سالدارىنان تىنىس الۋدىڭ قيىنداعانى تۋرالى دا ايتۋدا.
ۋكراينانىڭ Supernova+ جوباسى زىمىراننىڭ ۇشىرىلعان ءساتى مەن قۇلاعانى تۇسىرىلگەن ۆيدەونى جاريالادى. باق مالىمەتىنشە، وقيعا «دومباروۆسكي» اۋدانىندا بولعان. بۇل جەردە «ياسنىي» اسكەري عارىش ايلاعى ورنالاسقان.
قالالىق باسىلىمداردىڭ حابارلاۋىنشا، ياسنىي بيلىگى بولعان جاعدايعا قاتىستى ەشقانداي تۇسىنىكتەمە بەرمەگەن. ال پوليگوندا جارىلىس پەن ءورت بولعانى تۋرالى اقپاراتتى NASA FIRMS ءورت كارتاسى دا راستار وتىر.
The Insider پورتالىنىڭ جازۋىنشا، 2023 جىلى ورىنبوردان شامامەن 500 شاقىرىم قاشىقتىقتاعى «ياسنىي» عارىش ايلاعىن «اۆانگارد» راكەتالىق كەشەنىن ۇشىرۋعا بەيىمدەۋ ءۇشىن قايتا جاراقتاندىرۋ جۇمىستارى باستالعان. رەسەي پرەزيدەنتى ۆلاديمير پۋتين بۇل كەشەندى العاش رەت 2018 جىلى تانىستىرعان بولاتىن. ول جاڭا راكەتانىڭ قۇرلىقارالىق قاشىقتىقتارعا ۇشا الاتىنىن جانە ونى اتۋ مۇمكىن بولمايتىنىن ايتقان.
«اۆانگارد» سىناقتارى جانە پۋتين ۇسىنعان سيپاتتامالار ۆاشينگتوننىڭ قاتاڭ سىنىنا سەبەپ بولدى. اقش مۇنداي زىمىران جاساۋ 1987 جىلى كسرو باسشىسى ميحايل گورباچيوۆ پەن اقش پرەزيدەنتى رونالد رەيگان قول قويعان ورتا جانە قىسقا قاشىقتىقتاعى زىمىرانداردى جويۋ تۋرالى شارتتى بۇزادى دەپ ەسەپتەيدى.
رەسەي بۇل زىمىرانداردى ۋكرايناعا قارسى تولىق ماسشتابتى باسقىنشىلىعى بارىسىندا شابۋىلداردا قولدانعان بولاتىن.
