يران اقش-تىڭ تاياۋ شىعىستاعى قاقتىعىستى توقتاتۋعا باعىتتالعان ۇسىنىستارىن قابىلداماي، جاۋاپ رەتىندە ءوز تالاپتارىن ۇسىندى. بۇل تۋرالى جەرگىلىكتى PressTV تەلەارناسى ايتتى، دەپ حابارلايدى «ادىرنا» ءتىلشىسى.
يران بۇل ۇسىنىستاردى شيەلەنىستى كۇشەيتۋگە باعىتتالعان الداۋ ارەكەتى دەپ سانايتىنىن جەتكىزگەن. سونداي-اق ەل دەلدالدار ارقىلى بەرىلگەن ۇسىنىستاردىڭ قازىرگى ۋاقىتتا تالقىلانبايتىنىن اتاپ وتكەن. دەرەككوزدىڭ ايتۋىنشا، يراننىڭ جالپى بەس تالابى بار. ولار:
• قارسى تاراپتىڭ «اگرەسسياسى مەن تەررورلىق ارەكەتتەرىن» تولىق توقتاتۋ;
• يرانعا قارسى سوعىستىڭ قايتا باستالمايتىنىنا كەپىل بولاتىن ناقتى تەتىكتەر قۇرۋ;
• سوعىس سالدارىنان كەلگەن شىعىندار مەن وتەماقىلاردى اشىق تۇردە تولەۋ;
• بارلىق مايداندا جانە ايماق بويىنشا قاقتىعىسقا قاتىساتىن قارسىلىق توپتارى ءۇشىن سوعىستى تولىق توقتاتۋ;
• يراننىڭ ورمۋز بۇعازىن دەربەس باسقارۋ قۇقىعىن حالىقارالىق دەڭگەيدە مويىنداۋ جانە وعان كەپىلدىك بەرۋ.
ەسكە سالايىق، 28 اقپاندا اقش يزرايلمەن بىرلەسىپ يرانعا قارسى اسكەري وپەراتسيا باستادى. بۇعان جاۋاپ رەتىندە تەگەران يزرايلگە، سونداي-اق تاياۋ شىعىستاعى امەريكالىق بازالارعا، ونىڭ ىشىندە ساۋد ارابياسى، باحرەين، قاتار، كۋۆەيت جانە ءباا اۋماقتارىنداعى نىساندارعا زىمىراندار مەن ۇشقىشسىز اپپاراتتار ارقىلى سوققى جاسادى.
ودان بولەك، يراننىڭ ورمۋز بۇعازىن جاپقانى تۋرالى حابارلاندى. بۇل بۇعاز ارقىلى الەمدىك تەڭىز مۇناي جەتكىزىلىمىنىڭ شامامەن 30%-ى وتەدى. سونداي-اق پارسى شىعاناعى ەلدەرىنىڭ مۇناي ينفراقۇرىلىمىنا جاسالعان شابۋىلدار تۋرالى مالىمەتتەر تارادى. بۇل جاعداي مۇناي باعاسىنىڭ سوڭعى ءتورت جىلداعى ەڭ جوعارى دەڭگەيگە دەيىن كۇرت وسۋىنە سەبەپ بولدى. ورمۋزعا بايلانىستى داۋ سوعىس كەزەندە كەلىسسوز باستاۋعا سەبەپ بولعان.
