2026 جىلى قازاقستان جالپى ىشكى ءونىم ء(جىو) كولەمى بويىنشا الەمدەگى ەكونوميكاسى دامىعان 50 ەلدىڭ قاتارىنا ەندى. بۇل تۋرالى اناليتيكالىق Visual Capitalist پلاتفورماسى جاريالاعان رەيتينگتە ايتىلدى، دەپ حابارلايدى "ادىرنا" ۇلتتىق پورتالى.
حالىقارالىق ۆاليۋتا قورى بولجامىنا سايكەس، 2026 جىلى الەمدىك ەكونوميكانىڭ جالپى كولەمى 123,6 تريلليون دوللارعا جەتەدى. ساراپشىلاردىڭ دەرەگىنشە، جاھاندىق ەكونوميكاداعى نەگىزگى ءوسىم دامۋشى نارىقتار ەسەبىنەن قالىپتاسادى.
رەيتينگتە اقش، قىتاي جانە گەرمانيا ءجىو كولەمى بويىنشا الەمدەگى ەڭ ءىرى ەكونوميكالار رەتىندەگى پوزيتسياسىن ساقتاپ قالادى. 2026 جىلى اقش ەكونوميكاسى 31,8 تريلليون دوللارعا دەيىن ۇلعايادى دەپ كۇتىلسە، قىتايدىڭ ءجىو كولەمى 20,7 تريلليون دوللارعا جەتپەك. 2021 جىلدان بەرى بۇل ەكى ەل ەكونوميكالارىنىڭ جيىنتىق كولەمىن تيىسىنشە شامامەن 9 تريلليون جانە 4 تريلليون دوللارعا ارتتىرعان.
بولجام بويىنشا، ءۇندىستان ناقتى ءجىو-ءنىڭ 6,2 پايىزدىق ءوسىمى ناتيجەسىندە جاپونيانى باسىپ وزىپ، الەمدەگى ءتورتىنشى ءىرى ەكونوميكاعا اينالادى. ايتا كەتۋ كەرەك، 2020 جىلدان بەرى ءۇندىستان ءجىو كولەمى بويىنشا ۇلىبريتانيادان دا العا شىققان.
سونىمەن قاتار، اۋستراليا وڭتۇستىك كورەيانى ىعىستىرىپ، ەڭ ءىرى ەكونوميكالار تىزىمىندە 14-ورىنعا كوتەرىلەدى. ال بانگلادەش ەكونوميكاسىنىڭ 4,9 پايىزدىق ءوسىمى اياسىندا ۆەتنامدى باسىپ وزىپ، 33-ساتىعا كوتەرىلەدى.
رەيتينگ قورىتىندىسىنا سايكەس، قازاقستاننىڭ بولجامدى نومينالدى ءجىو كولەمى 320 ميلليارد دوللاردى قۇراپ، الەمدەگى ەڭ ءىرى ەكونوميكالار تىزىمىندە 50-ورىنعا تۇراقتاعان.
