بريتاندىق The Telegraph باسىلىمى ساياحاتشىلار ومىرىندە كەم دەگەندە ءبىر رەت كورۋگە ءتيىس تانىمال 10 ءشولدىڭ ءتىزىمىن جاريالادى. قازاقستاننىڭ ماڭعىستاۋ ءوڭىرى الەمگە ايگىلى ساحارا، اتاكاما جانە گوبي سياقتى مەكەندەرمەن قاتار اتالدى، دەپ حابارلايدى "ادىرنا".
ماقالا اۆتورى سارا مارشالل ماڭعىستاۋدىڭ تابيعاتىن وزگە پلانەتانىڭ كورىنىسىنە تەڭەيدى. باسىلىم بوزجىرا شاتقالى مەن ءۇستىرت پلاتوسىنىڭ ەرەكشەلىگىن جازعان.
ء«بىز مۇحيت تۇبىندە نە جاتقانىن تولىق بىلمەيمىز، بىراق قازاقستانداعى ءۇستىرت پلاتوسىنىڭ بورلى مۇنارالارى مەن اكتاس يىرىمدەرىن كورگەندە، مۇحيت تابانىنىڭ قانداي بولاتىنىن انىق ەلەستەتۋگە بولادى»، - دەپ سيپاتتاعان اۆتور.
The Telegraph ماڭعىستاۋدى «گەولوگيالىق عاجايىپتاردىڭ قازىناسى» دەپ اتاپ، ونىڭ باستى ەرەكشەلىكتەرىن ءتىزىپ كورسەتتى. ونىڭ ىشىندە اق بورلى جارتاسى مەن الىپ قۇزدارى ۇيلەسكەن بوزجىرا شاتقالى، تابيعاتتىڭ ءوزى قاشاعان جۇمباق دومالاق تاستار - شارلار القابى، جارتاستاردىڭ اراسىندا ورنالاسقان كونە جەراستى مەشىتتەرى اتالعان.
«كاسپي جاعالاۋىنداعى بۇل كوركەم دە جابايى تابيعاتقا تەك مۇنايلى استانا اقتاۋدان جول تالعامايتىن كولىكپەن، كەدىر-بۇدىر جولمەن جەتۋگە بولادى. قازىرگى ۋاقىتتا وڭىردە ءتۋريزمدى دامىتۋ جوسپارلانىپ جاتىر. ۇكىمەت تەمىرجول ستانتسيالارىنا، جاڭا اۋەجاي مەن كوپتەگەن كۋرورتتىق ايماقتاردىڭ قۇرىلىسىنا ينۆەستيتسيا قۇيىپ جاتىر»، - دەپ جازىلعان باسىلىمدا.
اۆتور بۇل وڭىرگە تۋريستەر قاپتاماي تۇرعاندا بارىپ، كورىپ قالۋعا كەڭەس بەرگەن.
