كوكشەتاۋدا ەر ادام ءوز بۇيرەگىن ساتپاق بولعان كەزدە ۇستالدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
اقمولا وبلىسى پوليتسيا دەپارتامەنتىنىڭ مالىمەتىنشە، ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى 25 مىڭ اقش دوللارىنا بۇيرەك ساتپاق بولعان دەرەكتى انىقتاعان. ەر ادام الماتى وبلىسىنىڭ تۇرعىنى ەكەنى انىقتالدى.
تەرگەۋ ماتەريالدارىنا سايكەس، كۇدىكتى الەۋمەتتىك جەلىلەردە ءوز اعزاسىن ساتۋ تۋرالى حابارلاندىرۋ جاريالاعان. بۇل جازباعا جەدەل قىزمەتكەرلەر نازار اۋدارىپ، ارنايى شارالار جۇرگىزگەن. ناتيجەسىندە ەر ادام كوكشەتاۋدا اقشا قاراجاتىنىڭ ءبىر بولىگىن الۋ كەزىندە قولعا ءتۇستى.
ۇستالعان كەزدە ونىڭ جانىنان اقشا، ۇيالى تەلەفون، سونداي-اق مەديتسينالىق انىقتامالار مەن تالداۋ ناتيجەلەرى تاركىلەنگەن. پوليتسيا مالىمەتىنشە، كۇدىكتى بۇعان دەيىن دە وسىنداي حابارلاندىرۋلاردى بىرنەشە رەت جاريالاعان.
قازىرگى ۋاقىتتا اتالعان دەرەك بويىنشا قىلمىستىق ءىس قوزعالىپ، بارلىق ءمان-جايلار انىقتالۋدا.
ايتا كەتەيىك، قازاقستاندا ادام اعزالارىن ساتىپ الۋ جانە ساتۋ زاڭمەن تىيىم سالىنعان.
تۇركىستان قالاسىنىڭ تۇرعىنى بۇيرەگىن 13 ملن تەڭگەگە ساتپاق بولعان.
