قاراعاندى وبلىسىندا قازاقستان رەسپۋبليكاسى جاڭا كونستيتۋتسياسىنىڭ جوباسى برايل قارپىمەن باسىلىپ، كوپشىلىككە تانىستىرىلدى. باسىلىم وبلىستىق كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحانادا ۇسىنىلدى. جوبا وبلىس اكىمدىگىنىڭ قولداۋىمەن جۇزەگە اسىرىلىپ، اقپاراتقا تەڭ قولجەتىمدىلىكتى قامتاماسىز ەتۋدەگى ناقتى قادام بولدى.
باسىلىمدى دايىنداۋعا ارنايى كىتاپحانا ماماندارى قاتىسىپ، برايل قارپىمەن باسىپ شىعارۋعا ارنالعان ارنايى تيفلوتەحنيكانى جانە جابدىقتاردى پايدالاندى.
– بىزدە برايل قارپىمەن باسىپ شىعاراتىن ارنايى پرينتەرلەر بار. قازاق جانە ورىس تىلدەرىندە باسىپ شىعارۋ مۇمكىندىگى قاراستىرىلعان. كونستيتۋتسيا جوباسىن ەكى تىلدە دە باسىپ شىعاردىق، – دەدى ارنايى كىتاپحانانىڭ قىزمەت كورسەتۋ ءبولىمىنىڭ باسشىسى ايجان يسينا.
مادەنيەت، ارحيۆتەر جانە قۇجاتتاما باسقارماسىنىڭ باسشىسى عالىمجان وتەلبايۇلى جاڭا كونستيتۋتسيا جوباسىندا ادام قۇقىقتارى مەن تەڭدىك قاعيداتتارىنا ەرەكشە نازار اۋدارىلعانىن اتاپ ءوتتى.
– ەڭ باستى قۇندىلىق – ادام. كونستيتۋتسيانىڭ جاڭا نۇسقاسىندا تەڭ قۇقىقتار مەن مۇمكىندىكتەردى قامتاماسىز ەتۋگە باسىمدىق بەرىلگەن. بۇل – ادىلەتتى ءارى ينكليۋزيۆتى قوعام قۇرۋ جولىنداعى نەگىزگى ۇستانىم، – دەپ اتاپ ءوتتى ول.
قاراعاندى وبلىسى اكىمىنىڭ اپپاراتى جانىنداعى گەندەرلىك تەڭدىك ماسەلەلەرى جونىندەگى شتاتتان تىس كەڭەسشى ايجان قياسوۆا باستامانىڭ ماڭىزدىلىعىن ەرەكشە اتاپ ءوتتى.
كىتاپ دانالارى كىتاپحانا قورىنا ەنگىزىلىپ، وقىرماندارعا قولجەتىمدى. بۇل باستاما قولجەتىمدى ءارى ينكليۋزيۆتى ورتا قالىپتاستىرۋداعى ماڭىزدى قادام بولىپ، قۇقىقتىڭ شىن مانىندە ءاربىر ادامعا قولجەتىمدى بولۋى ءتيىس ەكەنىن تاعى ءبىر مارتە دالەلدەدى.
